DÊRSIM- Dêrsim de bi hezaran kesan Roşanê Newroze pîroz kerd. Newroze de heme kesanê ke têkoşînê azadîye û demokrasî de cuya xo ra bîyê, înan rê silamî ameyê erşawitene û wina ame vatene: “Mîmarê aştî birêz Ocalanî rê hezar silamî.”

 

Bi sloganê “Newroza Azadî û Demokrasî” pêroyê Kurdîstanî de pîrozkerdişê Newroze yenê kerdene. Dêrsim de bi hezaran kesî beşdarê pîrozkerdişê Newroze ya Qadê Seyîd Riza yê Dêrsimî bîyê. Pîrozkerdişê Newroze deqîqeyêk rêzgirewtişê seba vîrardişê kesanê têkoşînê azadîye de cuya ra bîyê, dest pêkerd.

 

‘Newroze xoverdayîş a’

 

Hemşaredara Şaredarîya Dêrsimî Bîrsen Orhan qisey kerd û vat: “Newroze pîroz bo. Xoverdayîşê Roşanê Newroze qet nêqedîyayo û do qet nêqedîyo. Bizanê ke Roşanê Newroze xoverdayîş o, Dêrsim xoverdayîş o.”

 

Parlamentera DEM Partî ya Dêrsimî Ayten Kordu da zanayene ke ê tekoşînê estbîyayîşê aver benê û wina vat: “Newroze tarîx a. Dêrsim tarîxêko kehen o. Têkoşînê ma bi rastîya dayîkanê ma yê ke serê sibayî rîyê xo çarnayo ver bi rojî dewam keno.”

 

Serekwekîla Grûba DEM Partî Gulistan Kiliç Koçyigit zî dîyar kerd ke kurdî bi serran o vera her tewir astengî û qirkerdişan şer kenê û xover danê û vat: “Hezar silamî embazanê ma rê ke rayîrê têkoşînî de ca girewto. Awankerê aştî û wayîrê vengdayîşê 27ê sibate birêz  Abdullah Ocalan û Fîgen Yuksekdag, Leyla Guven, Ayşe Gokhan, Selahattîn Demîrtaş rê hezar silamî. Ma coşê 8ê Adare reyde Newroze pêşwazî kerde.”

 

Dimayê qiseykerdişan pêşengîya cinîyan de adirê Newroze ame wekerdene. Şar bi deyîran govende girewte.