STENBOL - Parlamentera DEM Partîyî ya Stenbolî Ozgul Sakî va ke qetilkerdişê cinîyan sîstematîk ê û polîtîkayê bêcezaverdayîşî cesaret dano gumanbaran. Ozgul Sakî bale ant dewaya Ayşe Tokyaze û eşkera kerd ke cinî her tewir şîdetê mêrdan dir rî bi rî manenê.

 

Wendekara zanîngehe Ayşe Tokyaz qezaya Kuçukçekmeceyî ya Stenbolî de hetê polîsê verên Cemîl Koç ra ameybî qetilkerdiş. Derheqê Cemîl Koç û 8 gumanbaran de dewa ameye akerdiş û dewa 24ê adare de Dadgeha Cezaya Giranî ya 2ine ya Edlîyeyê Kuçukçekmeceyî ya Stenbolî de ameye dîyayîş. Helwestanê rehet ê gumanbaran polîtîkayê bêcezaverdayîşî netîceya sîstemê edaletê mêrdan vet orte.

 

Parlamentera DEM Partîyî ya Stenbolî Ozgul Sakî derheqê mesele de qisey kerd û va ke qetilkerdişê cinîyan munferît nîyê, netîceya sîstemê edaletê serdestê mêrdan ê.

 

Ozgul Sakî va ke helwestê gumanbar Cemîl Koç netîceya polîtîkaya bêcezaverdayîşî ya Tirkîya ya û va: “Gumanbarî polîtîkaya bêcezaverdayîşî yê dewlete ra cesaret gênê. Gumanbar bi rehetî şeno vajo ‘ez mexdur a, aye bi xo merda.’ Gumanbarî bi xo bawer ê, cesaret gênê.”

 

‘Sîstemê edaletî mêrdan paweno’

 

Ozgul Sakî prosesê muhakemeyî zî ercna û va ke sîstemê edaletê bîyaye mêrdan paweno û va ke dewaya Ayşe Tokyaze de ancî yew rey nê dî yê û wina dewam kerd: “Ma ancî yew rey dî ke sîstemê edaletê Tirkîya mêrdan paweno. Ma qetilkerdişê cinîyan de zaf mîsalî şenê bidê. Merdişê Rojîn Kabaîşe û zafanêyê bînan. Eke keye û hevalê aye wayîrê dewaye nêvejîyabîyayîne, do serê hedîse biameyîne girewtiş û sey întîxar bimendêne. Dima ra Ayşe Tokyaz vînî bena, waya aye Esra Tokyaz muracat kena. La çi heyf hêzê asayîşî û emnîyetî îfadeyê cinîyan esas nêgênê. Dewaya Dîlovasîyî de zî eynî tablo est o. Beno ke mesele cîya bê la wexto ke mesele beno beden û cuya cinîyan, gumanbarî yenê pawitiş.”

 

‘Mesele huqûqî nîya, tercîhê sîyasî ya’

 

Ozgul Sakî dîyar kerd ke tewrbîyayîşê rêxistinê cinîyan ê dewayanê cinîyan zî yeno astengkerdiş û wina va: “Bi sebebanê cîyayan tewrbîyayîşê rêxistinê cinîyan yeno astengkerdiş. Na mesele meseleya huqûqî nîya, tercîhêk sîyasî ya. No nêzdîbîyayîş şîdetê mêrdan meşrû keno. Qetilkerdişê cinîyan şexsî nîyê, sîstematîk ê. Roje de hîrê cinî yenê qetilkerdiş. Roşan de yew roje de 6 cinî ameyî qetilkerdiş. Ganî rêxistinê cinîyan tewrê dewayan bibê. Wezaretê edaletî û wezareta karê zereyî ganî waştişanê sazîyanê cinîyan ê dewayanê cinîyan qebul bikerê.”

 

‘Ganî têkoşînê ma sîstematîk bo’

 

Ozgul Sakî tewr peyêne wina va: “Gumanbarî zanê ke paştîdayîş gênê. Gumanbarî her roje cuya cinîyan destê înan ra gênê. Hemverê nê ganî ma têkoşînê xo bidomnê. Ma cinî û femînîstî, rêxistinê cinîyan ganî hemverê nê têkoşînê xo sîstematîk bikerê. Peymana Stenbolî semedê îqtîdarî sey tehdîd bî. Nê semedî ra xo ra peyser antî. Qanûnê 6284 hema zî munaqeşeyan rê akerdo yo. Nê semedî ra zî mêrdeyî hêz û cesaret gênê. Semedê qelsîyê mekanîzmayê pawitişî cinî yenê qetilkerdiş. Şîdetê cinîyan ser o girêdayeyê polîtîkayê şerî yo. Ma cinî her wareyî de aştî wazenê.“​​​​​​​​​​​​​​​​