Rojda Aydin 

 

AMED - Çalakîkera TJAyî Nurten Uzumcu ser programê ke bi wesîleya 4ê Nîsane organîze bikero qisey kerd û nê vengdayîşî kerd: “Zaf muhîm o ke heme cinî 4ê Nîsane de tewrê festîvale û sewbîna rayîrşîyayîşê Gemlîkî bibê. Ma wazenê ancî yew rey vajê ke heta azadîya fîzîkî ya Birêz Ocalanî nêro qetîkerdiş, ma do meydanan de bê.”

 

Têgêrayîşê Cinîyanê Azadan (TJA) programanê xo yê 4ê Nîsane semedê rojbîyayîşê Rayberê Şarê Kurdî Abdullah Ocalanî bi sloganê “Demê cinîyan, demê azadîye û pêvînayîşî bi rayberêk azad dir o” eşkera kerd. TJAyî neql kerd ke ê do 4ê nîsane de Rihayî de û 19ê nîsane de zî Gemlîkî de bê. Çalakîkera TJAyî Nurten Uzumcu derheqê programî de qisey kerd.

 

‘Na paradîgma şaran rê bîya hêvî’

 

Nurten Uzumcu dîyar kerd ke paradîgmaya Rayberê Şarê Kurdî Abdullah Ocalanî tena semedê kurdan nîya, la semedê heme şarê Rojhelatê Mîyanênî zî muhîm a. Nurten Uzumcu dîyar kerd ke bi nê paradîgmaye, hêvîya cuya heçbeşî ya heme şaran ewro ancî yew rey gane bîya û wina dewam kerd: “Bi taybetî bi prosesê ke 27ê sibatî de dest pêkerd, ma ancî yew rey dî ke senîn şarî û cinîyan 8 û 21ê adare de pîrozbayîyanê Newroze de bi vejîyayîşê meydanan nê proses verike kerd. Çimkî na paradîgma û no proses hêvî dano şaran. Wexto ke ma serdemê krîtîkî ke ma tîya de yê ewnîyenê, ma vînenê ke Rayberê Şarê Kurdî Birêz Abdullah Ocalanî û PKK gamanê muhîm eştî. Mîyanê şarî de hîsê wayîrvecîyayîşî hemverê nê gaman est o, la dewlete hema tu gamanê verçimî nêeşta. Ganî êdî no bibo. Lazim o dewlete wezîfeyê xo bica bîyaro. Ganî ê wayîrê prosesî bivejê. Çimkî no vengdayîş tarîx de bêhempa yo. Muhîm o ke şarî wayîrê nê vengdayîşî bivejîyo.”

 

‘O yew rayberanê kêmvînaye yê seserra 21ine yo’

 

Nurten Uzumcu va ke Rayberê Şarê Kurdî Abdullah Ocalan 77 serrî yo têkoşînêk pîl domneno û armancê nê têkoşînî no yo ke şaran bîyaro têhet. Nurten Uzumcu sewbîna dîyar kerd ke Abdullah Ocalan vatî ke ganî cinî bi xoserbîyayîşî hawirdorêk azad de cuya xo biciwîyê û wina dewam kerd: “Têkoşînê xo yê 76 serranê semedê cuye de, 53 serrî tecrîdêk giranî de vîyarna, bi zehmetî û berpirsîyarîyanê giran dir rî bi rî yo. Ma tîya de qalê rayberêk kenê ke cuya xo nê têkoşînî rê terxan kerdî. Birêz Abdullah Ocalanî yew rayberanê kêmvînaye yê seserra 21ine yo, çimkî ey kerd ke zafanêyê ke boya înan birnabî, ancî boye bigîrê. Ey kerd ke zafanêyê ke herra înan wêranbîbî ancî xo ver bidê û nê semedî ra o binê tecrîdêk wina xidarî de yeno girewtiş.”

 

‘Berpirsîyarîyê tewr pîl milê cinîyan ser o yo’

 

Nurten Uzumcu dîyar kerd ke cinî heme xebatanê xo de azadîya fîzîkî ya Abdullah Ocalanî verê çiman de gênê û wina dewam kerd: “Çarçeweya kampanyaya ke ma 8ê adare de dayî destpêkerdiş de, ma heme bajarê Kurdistanî û Tirkîya de semedê azadîya fîzîkî çalakî, xebat û program ca anê. Ewro, ma wazenê qetî bikerê ke ma do cinîyan dir pêvînayîş bikerê ta ke hem derheqê azadîya fîzîkî hem zî wayîrvecîyayîşê prosesî de xebatêk cidî bikerê. Nê prosesî de, ganî cinî wayîrvecîyayîşî bigîrê xo ser û rol û mîsyonêk semedê xo dîyar bikerê. Eynî wextî de ma heme bi berpirsîyarîyêk pîl semedê rêxistinkerdişî û ciwîyayîşkerdişê nê paradîgmayî gênê ser xo. No keweno milê şarî û cinîyan ser. Bi nê hişmendîye, ma do nê demê kampanyayî de qaso ke destê ma ra yeno xebate bikerê, kuçe bi kuçe, taxe bi taxe, keye bi keye bigêrê û xo biresnê heme cinîyan.”

 

‘Heta azadîya fîzîkî nêro qetîkerdiş ma do meydanan de bê’

 

Nurten Uzumcu peynîya qiseykerdişê xo de wina va: “Ewro zaf bajarê Kurdistanî de amadekerdişanê 4ê nîsane dest pêkerdî. Ma wazenê vajê ke 4ê nîsane mîyanê ma de kelecan û moralêk pîl viraşto. Heme xebatî bi coş û moralêk pîl yenê domnayîş. 4ê nîsane Amarayî de, ma do ancî yew rey berzbîyayîşê xo û têkoşînê xo yê hemverê sîstemê zordarî bîyarê ziwan. Bi nê hîsan zereyê xo de, zaf muhîm o ke hevalê ma yê cinî wayîrê heme xebatanê ke ma kenê bivejê, tewrê înan bibê û sey wezîfe û berpirsîyarîyêk bivînê. Zaf muhîm o ke heme cinî 4ê nîsane de tewrê festîvale û sewbîna rayîrşîyayîşê Gemlîkî de bibê. Ma wazenê ancî yew rey vajê ke heta azadîya fîzîkî ya Birêz Ocalanî nêro qetîkerdiş, ma do meydanan de bê.“​​​​​​​​​​​​​​​​