Buşra Turan

 

ÎDIR - Dewa Mûçî de semedê ocaxê kerrayan ê ayîdê fîrmaya HARKAyî, binê nameyê “zêdekerdişê kapasîteyî” de, qerarê “Hewcedarîyê ÇED’î çin o” ame girewtiş û no qerarê rijîyayîşê ekolojîkî yê herême giranêr keno. Cinîyê ke dewe de manenê û semedê dînamîtan keyeyê înan rijîyeno, herre ra heywanê înan nêweş benê û nêweşîyê kronîkî vejîyenê orte, wina vatî: “Ma bêkes û bêwayîr verdayî. Mêrgê ma yenê îşxalkerdiş. Wareyê cuye yenê çinkerdiş.”

 

Kurdistan û Tirkîya de krîzê ekonomî her şino giranêr beno û polîtîkayê talanî dir yew beno û cuya dewijan resana noqteya tasfiyekerdişî. Sere de zî cinî tesîr benê û wareyê berardişî destê înan ra yeno girewtiş. Dewa Mûçî ya Îdirî de hetê fîrmaya HAKRAyî ra xebatê ocaxê kerrayan yenê domnayîş û binê nameyê “zêdekerdişê kapasîteyî” de, qerarê “Hewcedarîya ÇED’î çin o” ame girewtiş û no qerarê rijîyayîşê ekolojîkî yê herême giranêr keno. Cinîyê dewa Mûçî yê ke çimeyê debarê înan mêrgê înan o û herre înan ameya îşxalkerdiş, hemverê nê rijîyayîşê sîstematîkî hewl danê vengê xo bidê eşnawitiş.

 

Fatma û Fadîme Ozturk yê ke dewa Mûçî de manenê, derheqê xebatanê ocaxê kerrayan ke pesdewarî resnayo sewîyeya çinbîyayîşî û ziraro ke dînamît keyeyê înan rê dano qisey kerdî.

 

‘Herra ma bêawe mend’

 

Fatma Ozturk dîyar kerd ke semedê ocaxê kerrayan dewijî problem ciwîyenê û rayîr, derûdor û şertê debare bi hawayêk negatîf tesîr benê. Fatma Ozturk wina dewam kerd: “Ma nêzanê çi vajê. Ne rayîr est o ne war. Wesayîtî yenê semedo ke rayîr çin o nêşkenê bikewê zere. Ma bêrayîr mendî, ma bêca mendî. Ma nêzanê çi bikerê. Vanê kurdî wina yê. Her ca xerab bîyo. Ma bêkes, bêwayîr verdayî. Ez nê ocaxê kerrayan nêwazena. Herra ma bêawe mende. Heme xerab bîyî. Herre yena ma ser. Heme jehrî ya. Ma nêrehet benê. Heywanê ma çin benê. Keyayê 14 serrê verî cû ca dayo înan. Keyayo newe zî nêeşkeno çîyêk bikero. Her ca bîyo herrî.”

 

‘Keyeyê ma semedê dînamîtan lerzenê’

 

Fadîme Ozturk zî eşkera kerd ke semedê xebatanê ocaxê kerrayan mexdur bîyî û herra înan ameya desteserkerdiş, şertê cuya înan zehmet bîya. Fadîme Ozturk wina va: “13 tutê mi est ê. Di erdê mi est ê. Şîrket eşt ser. Heme wêran kerdî. Pesê ma uca de çêrîyenê. Ê cayî desteser kerdî. Ma zirar de yê. Ma mexdur ê. Ma bi xêrê pesê xo debarê xo kerdêne. Nika ma mexdur ê. Ameyîşê ma erdan ra bî. Ma feqîr û mexdur ê. Her ca bîyo herre. Ma nê ocaxan nêwazenê. Semedê dînamîtan keyeyê ma lerzenê û rijîyenê.“​​​​​​​​​​​​​​​​