MERKEZÊ XEBERAN - Wezîrê Edaletî Akin Gurlek, neql kerd ke derheqê 638 dosyeyê kerdoxê nêdîyar û 693 cinayetan de cigêrayîş dayê destpêkerdiş. 

 

Dimayê waliyê verî yê Dêrsimî Tûncay Sonel, lajê ey û xeylêk kesê bînî yê engişta înan vînîkerdişê Gulistan Dokûye de estbî, ameyî destbendkerdiş û tepiştiş, cinayetê kerdoxê nêdîyar ameyî rojeve. Wezîrê Edaletî Akin Gurlek, derheqê nê de hesabê xo yê medyaya dîjîtale ser o eşkerayîyêke nuşteyî vila kerd. 

 

Akin Gurlekî, derheqê xebatê Serekîya Daîreyê Cigêrayîşê Sûcê Kerdoxê Nêdiyar ke newe ame akerdiş, neql kerd ke semedê roşnkerdişê cinayetê kerdoxê nêdîyar xebatî ameyî destpêkerdiş. Akin Gurlekî dîyar kerd seranserê welatî de cigêrayîş kerdê û 75 bajaran de derheqê 638 dosyeyê kerdoxê nêdîyar û 693 cinayetan cigêrayîşî dayê destpêkerdiş.