STENBOL- Nasnameyê gerîlayanê PKKyî Zehra Kisaoglu û Suheyla Kaya ke Goristanê Garzanî ra ameyî vetene û Îstanbul de, Kîlyos de rayîrê pîyadeyan de ameyî definkerdene, bi pêgirewtişê nimûneyanê DNAyî yê keyeyanê înan ame tesbîtkerdene. Pawîyeno ke cenazeyî ewro bêrê berdene Kanîreş.

 

Zehra Kisaoglu (Raperîne) û Suheyla Kaya (Zîlane) serra 1999î de şehîd bîbî. Keyeyanê înan 17ê êlule de xeber girewte ke testê DNAyî pê girewto; dima ra muracatê Mudurîya Goristanan a Zincirlikuyu kerd û şîyî Goristanê Kîlyosî.

 

Bi tespîtê DNA'yî ke hetê Sazgehê Tipê Edlî (ATK) ra ame kerdiş, nasnameyê Zehra Kısaoglu û Suheyla Kaya ameyî eşkerakerdiş. Pawîyeno ke cenazeyî ewro Goristanê Kîlyosî ra bêrê girewtene û bêrê berdene qezaya Kanîreşê Çewlîgî.

 

Demê prosesê çareserîye yê 2013-2015 de cenazeyê 282 gerîlayanê PKKyî ke herêmanê cîya-cîyayan ê Bedlîsî de bîyî, ameybî berdene Goristanê Garzanî yê Taxa Olekê Corîn. Bi qerarê Walîtîya Bedlîsî 19ê kanûne 2017î de goristanî de xeylê gorî ameyî akerdene û cenazeyî seba tesbîtkerdişê nasnameyî ameyî şawitene Dezgehê Tibê Edlî yê Îstanbulî. 21 cenazeyê ke DNAyê înan pê girewt, teslîmê keyeyanê înan bîyî; ame vatene ke cenazeyê bînî Goristanê Kîlyosî de ameyî definkerdene. Dima ra eşkera bî ke 261 cenazeyî Kîlyos de herinda goristanî de beşê rayîrê pîyadeyan de ameyî definkerdene.