![](/staticfiles/news/67302/2017/10/14/823x463cc-141017-diyarbakir-ruken-akca-sur-fiskaya.png)
AKP mehkûmê vînîkerdişî yo
- 12:39 14 Teşrîna verêne 2017
- HEME XEBERİ
Duygu Cînîvîz
AMED - Hemsereka DBPyî ya Amedî Ruken Akçaye derheqê rijnayîşê qezaya Sûrî û qerarê îstîmlaqkerdişê taxa Fîskaya de qisey kerde û wina va: “AKP seba rantî Kurdistan talan kena; cok ra AKP Kurdistan de mehkumê vînîkerdişî ya”
Qezaya Sûrî ya Amedî ke 23ê gulane de rijnayîş tede dest pêkerdî, hîna dewam kenî. Heto bîn ra 11ê temmuze de Kombîyayîşê Heyetê Wezîran de derheqê Fîskaya de zî qerarê ‘îstîmlaqkerdişo lez’ ame girewtiş. Wexto ke merdim nê qeraran ra ewnîyeno, vîneno ke hukmat derheqê taxê vera polîtîkayê hukmatî xover danî, hetê hukmatî ra yenî rijnayîş. Babete ser o Hemsereka DBPyî ya bajarê Amedî Ruken Akçaye qisey kerde û vera nê polîtîkayanê rijnayîşan de reaksîyon nîşan daye. Rukene va ‘helbet cayê ke şar bi keda xo awan kerdî, îqtîdar rê nêverdanî’ û wina dewam kerde: “Şima eşkenî keyeyanê şarî birijnî, labelê sey yê Sûrî, şar do çadiran de daxî do têkoşînê xo bidomno.”
AKP hişê xoverdakarî ra terseno
Rukene dewamê qiseykerdişê xo de va ‘cayê ke hetê tarîxî û kulturî de hetê AKPyî ra yenî rijnayîş’ û wina domnaye: “AKP wazeno sey dewleta Osmanîyan bajaran birijna û biveşna û ê bajaran de zîhnîyetê xo awan bikero. Çimkî AKP hişo xoverdakar ra terseno. Sûr de tena kurdî nêcuyenî, cok ra ser bînan de zî hêrişî benî. Sûr eynî wext de bajarêkî yê cinîyan o. Ez zî Sûr de pîle bîya. Mi heyatê xo de tarîxo ke keyeyê mi ra va, mi ê tarîxî tena Sûr de hîs kerd. Cok ra ez ge-gane şîyêne Sûr; çimkî ewja de ez ameyêne hişê xo ser. Heme çîyî hîna hişê ma de ganî yî, no semed ra ê nêşenî ma bêhiş bikerî.”
Sîyasetêko tehlukeyin yeno meşnayîş
Rukene qiseykerdişê xo de bale ant qerarê îstîmlaqkerdişî yo ke seba Fîskaya amebî girewtiş ser û wina va: “Wina aseno ke vera Amedî de konseptêko taybet dewre de yo. Wexto ke merdim Fîskaya û Sûrî ano têhet, vejîyeno orte ke sîyasetêko tehlukeyin yeno meşnayîş. Taxê ke yenî rijnayîş hertim bîyî babeta deyîr û klaman. Ganî îqtîdar fek nê sîyasetî ra verabido. Polîtîkayê ke AKP Kurdistan de meşnena, mehkûmê vînîkerdişî yî. Domanê ke nika şenik î, wexto ke pîle bibî do hesabê nînan bipersî. AKP bi no hawa hêrsê şaran zêdeneno. AKP Kurdistan de mehkûmê vînîkerdişî yo.”