![](/staticfiles/news/67527/2017/10/15/823x463cc-page.jpg)
Kitabê Ocalanî sey delîlî hesibîyayî
- 14:00 17 Teşrîna verêne 2017
- NAROJANE
SAFÎYE ALAGAŞ
AMED – Serdozgerîya Komare ya Amedî vere cû derheqê Keyeyê Destekî yê Perwerdeyî (EDEV) yê ke girêdayeyê Şaredarîya Kayapinarî de tehqîqat daybî destpêkerdiş û na çarçewa de polîsan eştbî keyeyan ser Beyaz Kaya û Dîlan Çîçeke ameybî tepiştiş. Beyaz û Dîlane dima ra serbest ameybî veradayîş, serdozgerîye zî îdîanameyê înan temam kerde.
Serdozgerîye derheqê Beyaz û Dîlane de bi îdîaya ‘endamê rêxistine bîyayene’ ra 5 serrî ra heta 10 serrî ceza waşte. Serdozgerîye EDEVî sey dezgehê ke girêdayeyê PKKyî girewte dest. Reyna îdîaname de notê pêvînayîşî yo ke Rayberê Şarê Kurdî Abdullah Ocalanî 10, 19 û 29ê êlula 2010î de avûkatanê xo reyde kerdo û qala perwerdeyê bi ziwanê dayîke kerdo zî ca girewto. Serdozgerîye vatişê Ocalanî suc hesibnayo û dîyar kerdo ke EDEV zî seba nêyî ameyo rêxistinkerdiş.
Heto bîn ra îdîaname de ca dîyayo îfadeyê şahidanê nimiteyî yê bi nameyê ‘Kar’ û ‘Kadîfe’ û xeberê ke derheqê EDEVî de keyepelenê bînan de vejîyayî zî ameyî zêdekerdiş.
Seba wendekarê feqîrî perwerde suc o
Beyaz Kayaye wextê tepiştişî de îfadeyê xo de wina vato: “Hedefê awanbîyayîşê EDEVî seba perwerdedayîşê wendekaranê feqîran o. Sewbîna ti hedefê ci çin o. Ma seba ke endamê rojnameyê Ozgur Gundemî yî mîyanê xo de pere kom kerdo.”
Dozgerî îdîa kerdo ke EDEV seba ke musnayîşê îdeolojîyê rêxistine ameyo awankerdiş û rijnayîşê mektebanê bînan esas girewto.