Rojda Aydin

 

AMED - Cinîya 50 serrî Hezîne Yilmaza ke maya 7 domanan a, bazar de rotişê penîr, biharatan û dermanê çorekan hêz dana cinîyan.

 

Cinîya 50 serrî Hezîne Yilmaza ke maya 7 domanan a, eslê xo Êlih ra ya semedê problemê ekonomî bi keyeyê xo dir koçê qezaya Rêzan ê Amedî kerda. Hezîne semedê debara xo bikero nika bazarê kuçeyê Sakarya yê Rêzanî de rotişê penîr,  biharat û dermanê çorekan kena û pê debara xo kena. Hezîne va ke senîn her kes semedê debara xo bikero dest bi xebate kenê aye zî semedê debara xo nê karî kena û wina va: "Bi rastî ferqê cuyayîşê Amedî û Êlihî çin o. Semedo ke zehmetîyê ma tîya de cuyenê uca de zî esto. Ez zî semedê debara keyeyê xo bikerê û muhtacê kesî nêbî mi waşt dest bi nê karî bikerî. Goreyê prosesî her çiqas karê mi goreyê zerrîya mi nêbo zî reyna baş o."

 

'Wexto ke ez biwazî ti kes nêeşkeno çîyêk vajo'

 

Hezîne dewamê qalîkerdişê xo de va ke, semedo ke nê karî kena zaf kêfweş a û wina va: "Senîn her cinîyêke semedo ke muhtacî camêrdêke nêbo xebityena, ez zî hewl dana ke serê linganê xo de bimanî û muhtacê camêrdan nêbî. Mîyanê nê bazarî de sey xebatkara cinî, ez tena ya û ê bînî heme camêrd ê. Tay camêrdî mi ra vanê ti çira xebityena. La ez goş nêdana ti yewî. Semedo ke ez biwazî ti kes nêeşkeno çîyêk vajo."

 

'Heta ke mi ra bêro ez do bixebityî'

  

Hezîne dewamê qalîkerdişê xo de va kerdişê cinîyan wexto ke vînena û muşterîyê cinîyan ra zaf kêfweş bena û wina va: "Ez bi cinîyan bawer a. Cinî demo ke biwazê eşkenê her kar bikerê. Heta ke mi ra bêro ez do bixebityî û hêz bidî cinîyan."