STENBOL - Platformê Hemverê Nukleerî yê Sînopî 22ê Nîsane de mîtîng viraznenê û yeno pawitiş ke her çar hetê Tirkîya ra pawitoxê heqê cuwîyayîşî beşdar bibê. Kolektîfê Ekolojîyê Kadikoyî ra Denîz Erbake dîyar kerde ke mîtîngê Sînopî têkoşînê ekolojî wezîfeyêke girîng gêno serê xo.

 

Hetê Platformê Hemverê Nukleerî yê Sînopî verê 32yîn sergerra Çernobîlî yê 26ê Nîsane 1986 de virazyabi do bi mîtîngêke 22ê Nîsane Sînop de bêro organîzekerdiş. Yeno pawitiş ke her çar hetê Tirkîya de pawitoxê heqê cuwîyayîşî beşdarê mitîngî bibê. Mîtîng bi sloganê 'Hemverê kesê ke lêşin kenê ma vanê bicuwîyo cuwîyayîş' do virazyo û şahidêke qezaya santralê nuklerî yê Fukuşîma zî do beşdar bibo. Pawitoxê cuwîyayîşî derheqê awankerdişê bingehê santralê nuklerî yê Akkuyu yê Mersînî ameyo eştiş zî do vengê xo berz bikerê.

 

'Hemvervejyayîşê nuklerî têkoşînê topyekun o'

 

Kolektîfê Ekolojîyê Kadikoyî ra Denîz Erbaka ke Stenbol ra beşdarê mîtîngî bena dîyar kerde ke hemvervejyayîşê enerjîyê nuklerî eynî wextî de têkoşînê hemverê kapîtalîzmî yo û va amanc tena berardişê enerjî nîyo. Denîze da zanayîş ke Kolektîfê Ekolojîyê Kadikoyî hetê kesê têkoşînê ekolojî danê ra ameyo awankerdiş û va ê hemverê HESî yê. Denîze eynî wextî de da zanayîş ke têkoşînê hemverê nuklerî têkoşînêke topyekun o.

 

'Na cografya şahidê zirarê nukerî ya'

 

Denîze da zanayîş ke seba sebebê OHALî rojê zehmet cuwîyenê û va: "Wazenê vengê komelê sîvîl bidê birnayîş. Cografya xo de ma tewr zaf zararê nukleerî dîyê. Semedê Çernobîlî no welatî de bi seyan kesî bi rîşa merdimwere kewtî û merdî. Nika wazenê şaşîyêke bîn bêrê reynakerdiş. Ma destûr nêdanê ci."

 

Denîze peynîye qiseykerdişê xo de dîyar kerde ke mîtîngê Sînopê de têkoşînê ekolojî de wezîfeyêke girîng gênê serê xo.