MÊRDÎN - Ergun Baysalo ke sey qayûm tayînî şaredarîya Nisêbînî bi, xêrcê viraştişê rayîrî tu xizmet nêda şar û rayîrê ke sey 'vurnayîşê pîl' da naskerdiş zî, rijênê.

 

Dimayê OHALî bi KHKyan seba 83 şaredarîyê DBPî qayûm ame tayînkerdiş. 11ê Êlule 2016 de yew ci ra 28 şaredarîyê qayûm ame tayînkerdiş şaredarîyê Nisêbînî bi. Qeymeqam Ergun Baysal sey qayûm ame tayînkerdiş. Qayûm senîn ame tayînkerdiş heme karkerî kar ra vetî û serrêke û nîm o yewin xizmetê ey seba şarî ameyo kerdiş zî rayîrê ke ci ra vatêne 'Vurnayîşo pîl o' roja ke ameyo tayînkerdiş heta nika heme rayîran xira kerd û mîyanê herre de verda, nika zî rayîrê viraştiş de qeleşnayîş virazêno.

 

Qeza mîyanê herre û tozî de menda

 

Bajar mîyanê toz de mendo û xêrcê kuçeyê pîl heme xirabe yê. Dimayê pêrodayîşan qedexeyê tebervejyayîşê kuçeyan ra dima taxê rayîrê înan xira bîyê hema zî wina yê û çalê înan bi varanî benê gole herre û awe. Pêwa acisîyê şarî rayîrî nînê viraştiş û çapemenî de zî bi sernameyê 'Nisêbîn de vurnayîşê bi heybet' yenê serwîskerdiş.

 

Rayîrê newe ame viraştiş xira bi

 

Kuçeyê Cumhuriyetî yê 4 rey ame xirakerdiş û viraştiş bi germbîyayîşê hewa dir reyna dest bi xebatan ame kerdiş. Kuçeyê ke ame vatiş ke reya peynî û asfaltê ci ame wedartiş, seba toz û herre merdimî nêeşkenê derbaz bê. Hetêke viraştişê rayîrî dewam keno û hetêke ra zî rayîrê viraştişê înan temam bîyo zî hewteyê diyîn de xira bî. Hîn rayîrê taxê Barişî seba wesayîtan xira bî.