Bêrîtan Canozer

STENBOL - Cinîyê ciwanî dîyar kerdî ke weçînayîşê 24ê Hezîrane de piştdayîş danê HDPî. Cinîyan va: "Seba vengê cinî, ciwan û domanan bêro eşnawitiş, welat de kes cîya nêro vînayîş û hesabê cinîyê ke ameyê qetilkerdiş bêro perskerdiş ganî piştdayîş bidê HDPî." Cinîyê ciwanan heto bîn ra vengdayîşê namzedîyê cinîyê ciwanan kerdî.

Amadekarîyê weçînayîşê 24ê Hezîrane Tirkîya û Kurdistan de dewam keno. Bi taybet cinî û ciwanî dîyar kenê ke ê do vengê xo bi HDPî berz bikerê. Cinîyê ciwanî derheqê weçînayîşî de ewnîyayîşê xo vatî.

'Ganî ma hêvîyê xo zergûn bikerê'

Endama Meclîsê Ciwanan ê HDPî Dîlek Başarane ard ziwan ke HDP zafî temsîl keno û wina va: "Yewin partîya sîyasî ya ez sey xelisnayîşê welatî vînena HDP ya. Seba ke ez endama ci ya nê, merdimî çîyêk ra bawer nêkerê nêbenê endamê ci. Ez a bawerî de ya ke yewin partîya demokrasî bîyaro welat HDP ya. HDP seba ciwanan hêvîya ganî ma zî hêvî zergûn bikerê."

'Ez a bawerî de ya ke do cuyayîşêke bêro awankerdiş'

Cansu Kalendere zî da zanayîş ke hukmat seba çimê şarê Kurd û muxalîfan bitirsno weçînayîş rew ardo û wina va: "Bi no weçînayîşî hewl danê ke bitersnê. La dîyaro ke terseno. Ma do bimojnê ke ma sere nêtewênenê û xover danê. No weçînayîş seba ma destpêkêke newe yo. Ez no weçînayîşî de piştdayîş dana Selahattîn Demîrtaş. HDP eşkeno seba cinî û ciwanan çîyêk bikero. No semed ra wexto ke Selahattîn Demîrtaş bibo serekkomar do seba şaran cuyake newe bido destpêkerdiş. Ganî heme ciwanî binê sîwana HDPî de bêrê têhet û têkoşîn bimeşnê."

'Seba hesabê cinîyê ke ameyê qetilkerdiş bêro perskerdiş HDP'

Helîn Yilmaze zî ard ziwan ke hukmatî bi qerarê weçînayîşî mojnaw ke êdî nêeşkeno welat rayîra bero û ganî ma zî rayanê xo hetê kesê ke welat bi edalet û demokratîk bi rayîra benê bixebitnê. Helîne wina va: "Ez no semed ra raya xo HDPe. Heto bîn ra wextê îqtîdarê AKPî de kiştişê cinîyan zaf zêde bî. Îstîsmarê domanan zêde bi. Hêvîya no welatî HDP ya. Seba hesabê cinîyê ke ameyê qetilkerdiş ez vana HDP.”