AMED - Dayîka hepsîyê bi nameyê Muhîyeddîn Fîdancano ke xo vindîbîyayîşê hişmendî û nêeşkeno lazimîyê xo bikero, Hedîye Fîdancane dîyar kerde ke aye wazena lajê aye sewqê Amedî bêro kerdiş la cewab muracatî ra nêgîna.

 

Rewşa hepsîyê nêweş roj bi roje giran beno û pêwa hewldayîşê keyeyê nêweşan nînê veradayîş. Muhiyeddîn Fîdancano ke Hepisxaneyê Tîpê M yê Mîdyatî de maneno bi 27 serrî yo hepisxane de yo. Muhyeddînî rê 38 serrî ceza ro ci ameya birnayîş, hişê xo vindî kerdo û nêeşkeno lazimîyê xo bi ca bîyaro.

 

'Bi hetkarîya embazanê xo cuwîyeno'

 

Dayîka ey Hedîye Fîdancane va seba lajê aye bi serran o hepisxane de yo nêweş kewto û va: "Hişê xo vindî keno, mîdeyê xo rê rehet nîyo. Embazê ey sereyê ey şonê. Cilê ey danê ey ra. Lajê mi nêeşkeno lazimîyê xo bivîno. Tewr xirab zî nêeşkeno qisey bikero."

 

Hedîye va lajê mi surgunê xeylê hepisxaneyan ameyo kerdiş û wina va: "15 serrî yo Mîdyat de yo. Seba sewqê Amedî bêro kerdiş, ma xeylê rey waştiş name da la çîyêk nêkerdî. Kesî veng nêda vengê ma. Gelo kesêke 28 serran roşnî nêvîno, do senîn baş bimano. Qe nêbo wa bîyarê Amed û ma bêrê hişê ey. Qey wa cenazeyê lajê mi vejyo."