Gulîstan Azak

 

AMED- Rejîsor Meryem Yavuze dîyar kerde cinî sînema de yenê astengkerdiş û wina va: "Ma hunermendê cinî hemverê kesê ke vanê nêeşkenê bikerê, ma do bi fîlmê xo bimojnê ra. Do camêrdî adirê hunerî zerrîya ma nêtefnê.

 

Mîhrîcana Fîlman a Cinîyan Fîlmmora Gezicî ya Mîyanneteweyî ke emsar 16in virazya Stenbol, Antalya, Îzmîr, Trabzon, Bodrum, Mersîn û Amed decinîyan dir ameyî têhet. Rejîsor Meryem Yavuze ke mîhrîcan de beşdarê xebatê atolye bî bale ante serê problemê ke cinî sektorê sînema de cuwîyenê û wina va: "Hem Tirkîya û hem zî dinya sînema de cinî yenê astengkerdiş. Probleman cuwîyenê. Sektorê sînema de seba cinîyan xebate asan nîya. Yanî yenê astengkerdiş. Vanê 'cinî çi sînema ra fam kenê', 'Kamera giran ê nêeşkenê wedarnê'. La ma rejîsorê cinî hemverê nê vatişan, ma do bi fîlmanê xo cewab bidê înan."

 

'Do adirê zerrîya ma nêtefnê'

 

Meryeme arde ziwan ke heme çî ganî cinî warê sînema û hunerî de ca bigîrê û wina va: "Camêrdî do adirê hunerî yê zerrîya ma nêtefnê. Cinî ganî vengê zerrîya xo goşdar bikerê û hêzê cinîyan bimojnê ra."

 

Meryeme peynî de va ke ê xebata atolye de tewr zêde rastê persê 'çi cîyayî mabêne sînemaya cinî û camêrdan de esta? ameyê û va: "Fîlmmor ra ganî fîlmêke temaşe bikerê. Semedo ke Fîlmmor tercîhê xo hetê cinîyan ra kena."