WAN- Cinîyê hemverê tifaqê înan çin yenê hesibnayîş, weçînayîşê 24ê Hezîrane rêxistin kenê û wina vanê: "No weçînayîş bîyayîş û nêbîyayîşê şarê Kurdî yo. Weçînayîşê bîyayîşî yo. Bi taybet barêke kono serê milê cinî û ciwanan."

 

Wanê de cinî xebatê weçînayîşê 24ê Hezîrane rêxistin kenê û her kuçe û taxe de xebatan meşnenê. Sînem Balmale dîyar kerde ke weçînayîş şertê adîlane de nêvirazêno û wina va: "Hemverê texrîbatê ke faşîzm serê bedenê cinîyan meşneno, ganî ma pîya cewab bidê tifaqê AKP û MHPî."

 

'Mexdurê KHK şêrê serê sindoqan'

 

Hemsereka Genel Îşî yê Wanî Emîne Bozkurte zî da zanayîş ke no weçînayîş seba şaran îmkanêke yo û kedkarê ke ameyê îxrackerdiş  arde vîr û wina va: "No weçînayîş seba heme karker û kedkaran îmkanêke pîl o. No wextêke derg o welat bi KHKyan yeno îdarekerdiş. Bi hezaran karkerê ke karê xo ra bîyê cewabê tewr baş do weçînayîş de bidê şaran."

 

'Ma do no wisar heme çî taloq bikerê'

 

Cinîya bi nameyê Ayfer Gelîbolu da zanayîş ke OHAL de caardişê weçînayîşî meşrû nîyo û nê çî vatî: "Her ke hetê zelal benê, esas de no weçînayîş kelecanêke pîl awan keno. Bi hawayêke eşkera şarê Kurd teberê hetan yenê verdayîş. Hewl yeno dayîş ke bê Kurdan sîstem bêro awankerdiş. No semed ra no weçînayîş, weçînayîşê serekkomarî nê weçînayîşê bîyayîş û nêbîyayîş ê Kurdan o. Weçînayîşê bîyayîşî yo. Bi taybet barêke giran kono serê milê cinî û ciwanan. Ez veng dana heme cinîyan ke ganî heme çî no wisarî de taloq bikerê. Ganî her kes bi coş beşdarê xebatê weçînayîşê bibê."