MÊRDÎN- Aşmê vîyarte de seba kêmasîyê hacetê teknîkî Nêweşxaneyê Dewlete ya Kerboranî amebi rojeve û nika problemê asayîşî yenê cuwîyayîş.

 

Nêweşxaneyê Dewlete ya Kerboranî ke aşmê vîyarte de seba kêmasîyê hacetê teknîkî amebi rojeve, problemê ke yenê cuwîyayîş nêqedênê. Qezaya ke bi hezaran nifûsê aye esta, nêweşxaneyê dewlete zî kêmasîyê doktor û hacetê teknîkî estê û nêweşê ke yenê tîya eşrawenê Mîdyat. Pêwa pisporê ke welîdnayîşê cinîyan esta zî seba odaya welîdînayîşî çin a, nêweşxane de nika problemê asayîşî yenê cuwîyayîş. Nêweşxaneyo ke seranserê şewe doktoro/a nobedar û hemşîre estê, la  xebatkarê asayîşî çin ê.

 

'Lazimî bi asayîş çin o xora cayêke qij o'

 

Xebatkarê nêweşxane vatî pêwa ke bi desan rey muracatê Wezaretê Weşîye û Mudiriyetê Weşîye kerdê zî înan ra vatê 'lazimî bi asayîş çin o, xora cayêke qij o' û ê her roje babeta asayîşî de probleman cuwîyenê. Xebatkaran vatî heta serê siba nobete gênê û xo asayîş hîs nêkenê û va wextê ke problem yenê cuwîyayîş mecbur manenê vendê polîsan.

 

'Asayîşê ganê xebatkaran çin o'

 

Xebatkarêke nêweşxaneyî wina va: "Verê zî ma bi desan rey waşt la vatî lazimî pê çin o. Wezîfedarê asayîşî nêdayî ma. Verê hêrişê fîzîkî zî ame cuwîyayîş. Her roje bi merdimê nêweşan dir problem yenê cuwîyayîş. Doktorî êdî nêzanê se bikerê. Asayîşê ganê kesî çin o. Her kes bi endîşe yeno nêweşxane."