ÎZMÎR - Dayîkê Aştîye dîyar kerdî ke ê weçînayîş de piştdayîş danê HDP û namzedê serekkomarîyê Selahattîn Demîrtaşî û wina vatî: "HDP partîyê her kesî yo. Seba domananê ma rayê ma seba HDPî yê."

 

Dayîkê Aştîye dîyar kerdî ke weçînayîşê 24ê Hezîrane de do rayê xo hetê aştî û edaletî bixebitnê. Dayîkê aştîye vatî do weçînayîşê serekkomarî de zî piştdayîş bidê namzedê HDPî Selahattîn Demîrtaşî û do hetê çareserî de tercîhê xo bikerê.

 

'Reyan medê kesê ke bi şer wayîr benê'

 

Dayîkê Aştîye ra Medîne Kaymaze arde ziwan ke şarê Kurdî heqê înan yê tewr sereke bêpar mendê û wina va: "Ciwanê ma hepisxaneyan de yê. Ma keyeyê ma ra kerdî. Domanê ma ameyî qetilkerdiş. Her tewir teda serê ma de yeno kerdiş. Ma wazenê Kurd û heme şar aştî de bicuwîyê û cuyake bi rûmet bicuwîyê. No weçînayîş krîtîk o."

 

Medîne da zanayîş ke sey Selahattîn Demîrtaşî xeylê parlamenter, hemşaredar û kesê demokrat tepişnayeyê û wina va: "Ganî her kes raya xo bida Demîrtaş. Televîzyonê ma, çapemenîya ma, rojnameyê ma ameyî padayîş. Ez sey dayîkêke aştî seba domananê xo, seba  destpêkêke newe raya xo bidî Demîrtaş."

 

'Ege de dewijî rewşêke nêbaş de yê'

 

Dayîka Aştî Perîhan Kortake zî arde ziwan ke şar hemverê yewbînan kerdê dişmin û mahkumê feqîrî ameyê kerdiş û wina va: "Ciwan betal ê û kesê ke meclîse de nişnenê ro zî çîyêk nêkenê. Verê weçînayîşan soz danê la nîyanê ca. Hem Kurdistan û hem zî Tirkîya de merdimî acis bîyê. Ege de dewijî gazincan kenê. Wazenê yew vejyo destê înan bigîro. HDP tena partîya Kurdan nê partîya her kesî ya."