Lîlav Elî -Tolîn Mohemed

 

ŞEHBA - Cinîyê dewa Kefersefirî yê Cindirêsa bajarê Efrînî dayî zanayîş ke seba ke reyna biagêrî herra xo ser do têkoşîn bidî û wina vat: “Cinîyê kurd yê Efrînî bi têkoşînê xo nîşan dayî ke do tu reye teslîmê dişmenan  nêbî.”

 

Badê operasyonê Artêşa Tirkî (TSK) û komê OSOyî deshezaran hemwelatîyî Efrînî ra koçê Kantonê Şehba kerdî. Deshezaran efrinijê ke Kampa Xoverdayîşî ya qezaya Fafîn û kampa Serdem ya qezaya Ehresî de bi ca bîyî paweyê roja agêrayîşî yî. Babete ser o cinîyê Dewa Kefersefirî yê Cindirêsê bajarê Efrînî qisey kerdî û dîyar kerdî ke seba agêrayîşî do têkoşîn bidî. 

 

Cinîyan ra Esmehan Cafere qiseykerdişê xo de wina va: “Ma xo bi fikrê Rayber Apoyî rêxistin kenî û vera hêrişê dagirkeran de vindenî. Xoverdayîşê Seserre de cinîyê kurd xover dayî û destûr nêdayî ke tu hêzî îradeya înan bişiknî. Ma vera heme wehşan de xover dayî û xo pawitî. Ma do têkoşînê xo dewam bikerî.”

 

'Ma bi îradeyêka azad xo pawit’

 

Xedîc Resuloye zî qiseykerdişê xo de daye zanayîş ke roja destpêkerdişê hêrişan ra nata ê dewa Kefersefirî pawitî û vera dişmenan de çong nêronayî. 

 

'Ma do heta peynî xover bidî’

 

Newroz Sîdoye zî wina va: “Ma vera tanq û topê dewleta tirkî de xover daye. Wextê dagirkerîya dewleta tirkî de ma bîyî şahidê qetilkerdişê doman û cinîyan. Bi hawayo wexşane hêrişê ma kerdî. dewleta tirkî sivîlan qetil kerde. Labelê kurd hêzê xo kerdî yew û têkoşîn dayî. Heta peynî do têkoşîn bêro meşnayîş.”