MELETÎ - H. hetê kesê bi nameyê M.B yo ke Mudirîyê Perwerdeyê Neteweyî yê Meletî de sey serekê ramitoxan xebityeno rastê îstîsmaro zayendî amî û gerre kerde. H. dîyar kerde ke vera ke mudir bi aye bawer bikero, vatişanê M.B verê çiman de gêno û cayê wezîfeyê aye vurnay. H.ye va aye cinîyan ra piştdayîş pawena û va sazgeh tacîzî peygoş keno.

 

Cinîya bi nameyê H. ya ke Mudirîyê Perwerdeyê Neteweyî yê Meletî de sey xebatkara pakîye xebityena serra vîyarte de aşma Nîsane de hetê serekê ramitoxan M.B yo ke eynî ca de xebityeno ra rastê tacîzê zayendî amî. H. çîyê ke cuwîyaya JIN NEWSî rê qalî kerde û dîyar kerde ke aye derheqê babete de Walîyê Meletî rê gerre kerda la tu çîyêk nêameyo kerdiş.

 

H. va ke dimayê gerrekerdişê aye ameyo eşnawitiş M.Bî Mudirîyê Perwerdeyî de derheqê aye de bi sebebê ‘karê xo nêkena' gerre kerdo û va Mudir aye ra bawer nêkeno û bi vatişanê M.Bî bawer keno. H. da zanayîş ke aye embazanê xo ra eşnawito ke cayê wezîfeyê aye ameya vurnayîş û va gerrekerdişê înan verê çiman de nîno girewtiş û tacîz zî peygoş kenê. 

 

H. peynîya qiseykerdişê xo de veng da ke cayê karî de xeylê cinî rastê tacîzê M.B ameyê û sazgehî na rewşe nêvînenê. H. eynî wextî de cinîyan ra vera tacîzî piştdayîş pawena.