ENQERE - Meclîsê Prosesê Weçînayîşî bi amacê weçînayîşê 24ê Hezîrane bi asayîş derbaz bibo, ame awankerdiş û xeylê bajarê Tirkîya de xebatan meşnenê. Endamê  platformî vera xîleyê sindoqan vengdayîş kerdî û vatî: "Hêvî esta, ê ke biserkewte bê ma yê."

Unîversîteya Gazî ra Mizgîn Sungule dîyar kerde ke kesê Meclîsê Prosesê Weçînayîşî de ameyê têhet derdê înan asayîşê sindoqan o û wina va: "Ez seba asayîşê sindoqan beşdar bîya. Ma va asayîş ma eşkenê senîn bigîrê, ma eşkenê se bikerê? Hemverê xîleyê YSKî û qanûnê bi xîle ma pîya munaqaşa kenê. Meclîsê Prosesê Weçînayîşê aşma Çele de bi beşdarbîyayîşê 350 kesî Stenbol de ame awankerdiş. Dimayê îzahatê qerarê weçînayîşî rew ra dima Enqere de awankerdişê xo îlan kerd."

'Bi raydayîş babete nêqedêna'

Mizgîne dewam de da zanayîş ke pêwa ke Enqere de awanbîyayîşêke newe yo zî rastê eleqeyêke pîl ameyo û wina va: "Asayîşê sindoqan tena serê sindoqan de pawitiş nîyo. Plansazkerdişê girîng ameyê kerdiş. Zafê xo ser hesabê medyaya komelî de muracat ameyî kerdiş. Ma vilawikanê xo vila kenê. Ma tespît kerd ke şar wazeno rayan bipawo. Yanî vejyaw meydan ke êdî bi raydayîş tena babete nêqedêna. Seba wexto ke kilm mendo, xebatê perwerde dewam kenê. Eynî wextî de xebatê derheqê muşahîdî û endamîyê heyetê sindoqan zî yenê kerdiş. Xebatê ma do heta weçînayîş dewam bikerê.

Betul Atalaya zî meclîsî de xebityena va, aye xeylê zanayîşê newe musaya û arde ziwan ke sebebê aye beşdarbîyayîşê xebatan a ya ke asayîşê sindoqan bira girewtiş û da zanayîş ke do kombîyayîşan de xo rêxistin bikerê û do proses bi serkewte temam bikerê.