Îzmîr- Gullu Karadaga ke yoruka Egeye ya dîyar kerd ke 90 serrî yo ke Tirkîya de tu çîyêk nêameyo bedilnayîş û do raya xo seba bedilnayîşê sîstemê hemserekî bida HDPyî.

 

Seke yeno zanayîş 24ê Hezîrane de do şarê Tirkîya û Kurdistanî şêrî sindoqan ser û rayanê xo bixebitnî. Heme reng, bawerî û sewbîna cîyayenî do roja weçînayîşî de bibî yew veng. Gulu Karadage cinîya yoruke ya Egeye ya û seba ke dîplomaya xo ya mektebê seretayî newe girewta Îzmîrî ra nêbîya namzede. Her çina beno wa  bibo reyna zî Karadage seba aştîye heme kesan rê waşte ke rayanê xo bidî HDPyî. 

Babete ser o Gullu Karadage qisey kerde. Gulluye destpêk qiseykerdişê xo de wina va: “Ganî heme bindestî piştî bidî HDPyî. Sewbîna weçînitoxî wa reyna nêkewî şaşî  rayanê xo nêdî sewbîna partîyan. Wa bedilnayîş bibî û xo bibedilnî. Êdî berardişî de erj nêmend o. Dewijtî qedîya yo û ameyo çinkerdiş. Dewijî destê patron û otelan de sey kole yenî xebitnayîş. Ciwanî bîyî tiryakê madde."

 

'Îqtîdar aştî ra terseno'

 

Gulluye qiseykerdişê xo yê peyênan de zî wina va: “90 serrî yo ke Tirkîya de bedilnayîşêk nêvirazîya yo. HDP sîstemê hemserekî esas gêno. Şer tewr zêde tesîrê xo dano cinî û domana ser. Ganî sere de cinî vera heme neheqîyan de sere wedarnî.”