AMED - Cinîyê ke bajarê Amedî de tewrê xebatanê weçînayîşî benî dîyar kerdî ke heme hetê bindestî Partîya Demokratîke ya Şaran (HDP) de yenî temsîlkerdiş.  

 

Seke yeno zanayîş 24ê Hezîrane de do şarê Kurdistan û Tirkîya şêrî sindoqan ser û rayan bixebitnî. Amadekarîyê weçînayîşî bê maben dewam kenî û xebat resayî merheleya peyêne. Namzedê Partîya Demokratîke ya Şaran (HDP) keye bi keye gêrenî û zanayîşan danî şar. Cinîyê bajarê Amedî zî tewrê nê xebatan benî û seba demokrasî, aştî û seyyewbînanî heta saetê şewe xebitîyenî. 

 

Cinîyê ke bajarê Amedî de tewrê xebatanê weçînayîşî benî dîyar kerdî ke heme hetê bindestî bi HDPyî yenî temsîlkerdiş. Babeteser o cinîyê bi nameyê Hasret Akar, Guler Çîftçî, Ulaş Kizgindemîr û Zeynep Demîr Akçere qisey kerdî.

 

Hasret Akare qiseykerdişê xo de bale ante heqê cinîyan ser û wina va: “Seba azadîya cinîyan û ya dinya rayan bidêne HDPyî. Selahattîn Demîrtaş, Sebahat Tuncel, Fîgen Yuksekdag û bi hezaran siyasetmedarê ma tewqîfkerdeyî. Weçînayîşê 24ê Hezîrane, weçînayîşê edaletî yo. Rewşa OHALî de weçînayîş yena kerdiş. ganî heme kesî şêrî sindoqan ser û wayîrê rayanê xo bivejîyî. Bedilnayîş bi têkoşînî beno.”

 

‘Seba ameyoxê domanan HDP’

 

Guler Çîftçîye qiseykerdişê xo de qala weçînayîşî kerde û wina va: “Ez wazena ke hetê dayikan de ca bigîra. Çîyê ke yenî kerdiş adîlane nîyî. Cok ra ez raya xo dana HDPyî. Cografyaya ma de her wext OHAL esta. Ma wazenê ke na rewşe bêra bedilnayîş. Ganî ma seba ameyoxê domanan rayan bidî HDPyî.”

 

‘Ganî ma seba domanan rayan bidî HDPyî’

 

Ulaş Kizgindemîr û Zeynep Demîr Akçere zî qiseykerdişê xo de wina vatî: “Cografyaya Kurdistanî de heme prosesan de OHAL estbî. Labelê tu OHAL nêeşna ma çin bikero. ma do rayan bidî HDPyî. Ma bi nanê xo yenî tehditkerdiş. Bi hezaran karker û kedkarî ameyî îxraçkerdiş û tewqîfkerdiş yê ke mendî bi yenî tehditkerdiş. Heme tedaye bin nameyê OHALî de yenî kerdiş. Seba ke welat bi OHALî nêro îdarekerdiş, ma vanê HDP."