Mîdye Miqted

 

HELEB - Jinên li Helebê tevli çalakiya çandina daran a ji bo 4'ê Nîsanê bûn diyar kirin ku ew ê vê salê bikin sala azadiya Rêberê Gelê Kurd Abdullah Ocalan û wiha gotin:"4'ê Nîsanê rojbûna mirovahiyê ye."

 

Li bajarê Helebê Kongra Star bi boneya 4'ê Nîsanê roja rojbûna Rêberê Gelê Kurd Abdullah Ocalan 200 dar çand. Dar li qada Newrozê ku dikeve devera bi navê Şiqeyêf bi tevlîbûna hemû destgehên taxê hatin çandin û bi gerandina govendê ev roj kirin şahî û pîroz kirin. Jinên tevli vê çalakiyê bûn nêrînên xwe anîn ziman. 

 

'Me xwe bi saya Rêbertî nas kir'

 

Endama Koordînasyona Kongra Star a bajarê Helebê Rîhan Alo axaftina ya têkildarî 4'ê Nîsanê wiha kir:"Em roja rojbûna Rêbertî ku ji bo me roja vejînê ye pîroz dikin. Tiştê ku dihêle em roja 4'ê Nîsanê ji xwe re weke roja vejîna jinan bidin pênasekirin ew e ku ji ber ku me bi saya ramanên Rêbertî xwe nas kir û me jiyana xwe da destpêkirin her wiha dîroka bi hezar salî jin kir kole, wek kefenan hat çirandin û dest bi nivîsandina dîrokên tijî têkoşîn hat kirin."

 

'Divê mîrasa ku rêbertî ji me re hişt em biparêzin'

 

Rîhan Alo got:"Erê her sal Rêberê me mezin dibe lê belê ji ber ku em bi saya ramanên Rêbertî bûn xwedî ked û têkoşîn û şoreş her ku diçe hêviyên me jî mezin dibin. Hêviyên me jê ew e ku em bikaribin bi hev re jiyanek wekhev û demokratîk her wiha ekolojî bidin avakirin. Ji ber ku dema em ji Rêberê xwe re li gor daxwaza wî daran didin çandin em mebesta rêbertî ku dibêje ekolojiyê şîntir bikin didin pêkanîn. Divê mîrasa ku Rêbertî ji me re hiştiye, em mezin bikin û bidin parastin."

 

'Rêbertî felsefeya resteqîn pêşkêşî me kir'

 

Her wiha Sebah Xelîl jî têkildarî 4'ê Nîsanê axaftina xwe bi ajansa me re parve kir û wiha got:"Em îro li vir di 3'yê Nîsanê de bi boneya rojbûna Rêbertî daran didin çandin. Em vê rojê li gelê Kurd û Rêbertî pîroz dikin, rêbertî raman sinc û felsefeya resteqîn pêşkêşî me kir, lewma divê em gotin û felsefeya Rêbertî her di mejî û hişê xwed de bihêlin."

 

'Em ê vê salê bikin sala azadiya Rêbertî'

 

Di dawiya axaftina xwe de Sebah Xelîl got:"Em ê vê salê bikin sala azadiya Rêbertî. Em îsal gelek kêfxweş in ku bi saya peyama Rêbertî ya pêkanîna aştiyek cîhanî pêvajoyeke nû dest pê kir. Peymanên lihevkirinê li Sûriyeyê hatin îmzekirin. Em ê vê salê bikin sala azadiya Rêbertî û pêkanîna aştiyek cîhanî."