Rabîa Onver   

 

WAN - Hevseroka DEM Partiyê ya Wanê Gulşen Kurt, diyar kir ku piştî peyama Rêberê Gelê Kurd Abdullah Ocalan di 8'ê Adarê û Newrozê de gel bi ruhê aştî û azadiyê daket qadan û got: "Tevî ku her kes bi vî rengî bi hêvî ye û bangawaziyê hembêz dike, em li bendê ne ku hikûmet di zûtirîn demê de gavên pratîkî bavêje." 

 

Rêberê Gelê Kurd Abdullah Ocalan piştî hevdîtina 27'ê Sibatê ya bi Heyeta Îmraliyê re banga "Aştî û Civaka Demokratîk" ji raya giştî re kir. Piştî bangê peyama Abdullah Ocalan a ji bo jinan a bi wesîleya 8'ê Adarê Roja Jinên Cîhanê hate xwendin û ev peyam bi eleqeyek mezin û coşeke mezin hate pêşwazîkirin. Gelên ku banga sedsalê ya ku di 27’ê Sibatê de ji aliyê Rêberê Gelê Kurd Abdullah Ocalan ve hat dayîn, qebûl kirin, di pîrozbahiyên 8’ê Adarê û Newrozê de careke din nîşan dan ku banga “Aştî û Civaka Demokratîk” hembêz dikin.

 

Hevseroka Partiya Wekhevî û Demokratîk a Gelan (DEM Partî) a Wanê Gulşen Kurt derbarê mijarê de ji ajansa me re axivî û bal kişand ser pêvajoyê. 

 

Bangewazî û Newrozên dîrokî 

 

Gulşen Kurt destnîşan kir ku xitimandin û tundiya bi sedsalan a li ser pirsgirêka Kurd hatiye ferzkirin bi banga dîrokî ya 27'ê Sibatê ya Rêberê Gelê Kurd Abdullah Ocalan pêvajoyeke nû daye destpêkirin û got: "Pêvajoya ku bi peyama dîrokî tê meşandin di 8'ê Adarê û Newrozê de li qadan xwe nîşan daye. Me dît ku piştî vê bangê li taxan û kolanan coş û hêviyek mezin di nav gel de çêbû. Gel jî nîşan da ku li pişt banga birêz Abdullah Ocalan in. Pîrozbahiyên li Kurdistan û Tirkiyeyê bûn bûn Newrozên dîrokî."

 

'Me berxwedanek mezin da'

 

Gulşen Kurt, destnîşan kir ku bi milyonan kes xwedî li banda Rêberê Gelê Kurd Abdullah Ocalan derketin û wiha dirêjî da axaftina xwe: "Bi salan e daxwaza gel a pêk anîna aştiyê heye. Mijara pêkanîna aştiyê ne tenê mijara kurda ye, mijara hemû gelên bindest e. Em soz didin ku em ê bi hev re xwedî li vê bangê derketin. Em bi bedelên giran hatin heta wan rojan lê me tu carî serî netewand. Ji bo aştî bê vî welatî me li qadan û kolanan berxwedanek mezin da û em ê bidin jî." 

 

'Jiyaneke bi rumet û demokratik hewce dike'

 

Gulşen Kurt, diyar kir ku aştî û civaka demokratîk li pişt Banga Sedsalê ye û ji bo aştiya bi rûmet di zûtirîn demê de pêk were, ew ê têbikoşin û wiha dirêjî da axaftina xwe: "Bi milyonan kes daxwaza azadiya fîzîkîkî ya birêz Abdullah dike. Divê hikûmet gavên pratîk bavêje û ya girîng hem di asta qanûnî û hem jî di asta destûrî de pêvajoya qanûnî bide destpêkirin. Pêdiviya vî welatî bi aştiyeke bi rûmet û jiyaneke demokratîk heye."

 

'Divê hikûmet gavan bavêje'

 

Gulşen Kurt, diyar kir ku xwedîderketina li pêvajoya ku di pêşengiya jin û ciwanan de hatiye destpêkirin, heye û wiha dawî li axaftina xwe anî: "Jin û ciwanan nîşan dan ku paradîgmaya Birêz Abdullah Ocalan hembêz kirine û pêşengên jiyaneke nû ya ku tê avakirin, bûne. Posterên Birêz Abdullah Ocalan li her derê hatin vekirin û baweriya ciwanan a bi Abdullah Ocalan jî anîn ziman ku ew li pişt vê bangê bûn. Em li bendê ne ku di zûtirîn dem de gavên pratîk bên avêtin."