AMED - Tevgera Jinên Azad (TJA) derbarê Halime Tonguç a koça dawî kir de daxuyaniyek weşand û got, "Halime Tonguç dayikek bû ku jiyana xwe ji bo avakirina aştiyek bi rûmet terxan kir û di her qonaxa têkoşînê de li berxwe da."

 

Tevgera Jinên Azad (TJA) derbarê Halime Tonguç de, ku jiyana xwe ji bo aştiyê terxan kir û koça dawî kir, daxuyaniyek nivîskî weşand. Di daxuyaniyê de hate destnîşankirin ku Halime Tonguç di dilê gel de wekî "Dadê Halîme" cihek qezenc kiriye.

 

Daxuyaniya TJA'yê wiha ye: "Halîme Tonguç dayikek bû ku jiyana xwe ji bo avakirina aştiyek bi rûmet veqetand, di her qonaxa têkoşînê de bi israr sekinî. Bi salan bi hewldan û biryardariyeke bênavber, ew bû dengê aştiyê. Heta di demên herî krîtîk ên tenduristiya xwe de jî, wê di baweriya xwe ya bi aştî û azadiyê de israr kir. 

 

Dadê Halime, ku wesiyet kir ku ew li ser axa xwe, li kêleka şehîdan were veşartin, ne tenê xemgînî, lê di heman demê de mîrateyek berxwedanê ya bi rûmet jî ji me re hişt. Li pêşberî Dadê Halime, em careke din soz didin ku em ê aştiya ku dayikên me heta di nefesa xwe ya dawî de jî dev ji gotina wê bernedane, pêk bînin; xeyalên wan ên neqediyayî bi siberojek azad tacîdar bikin.

 

Bîranîna wê dê di têkoşîna me de bijî; bila stêrk bibin hevalbendên wê."