NAVENDA NÛÇEYAN - Leyla Şaylemez ya li Parîsê hat qetilkirin, ewil bû Leyla Qasim piştre bû Ronahî. Leyla ku wek navê xwe têkoşîn mezin hişt, ji bo nifşê piştî xwe dibe hêz.

 

 Di 9’ê Çileyê 2013’yan de li Parîsa Fransayê yek ji kadroya damezrîner a PKK’ê Sakîne Cansiz (Sara), Endama Tevgera Ciwanan Leyla Şaylemez (Ronahî) û Nûnera Kongreya Netewa Kurdistanê (KNK) ya Parîsê Fîdan Dogan (Rojbîn), hatin qetilkirin û di ser komkujiyê re 11 sal derbas bûn. Komkujî piştî  hevdîtina 3’ê Çileya 2023’an ya bi Rêberê PKK’ê Abdullah Ocalan re pêk hat. Yek ji jinên di komkujiyê de hat qetilkirin Leyla Şaylemez bû. Leyla di 1988’an de 1’ê Çile li Mersînê hat dinê. Navê Leyla Qasim ya yek ji pêşengên têkoşîna jinên Kurd bû lê hat kirin.  Bavê wê piştî salan şûnde got ‘keça min heqê navê xwe daye’. Piştre Leyla bi daxwaza xwe navê Ronahî girt.

 

Ji ber polîtîkayên zextan koç kirin

 

 Yek ji sê jinên hatin qetlkirin Leyla bû û ya herî ciwan bû. Malbata wê ya li Licê dijiya ji ber zextên dewletê koçî Mersînê dike. Leyla li wir tê dinê. Di 1’ê çileyê 1989’an de li Mersînê tê dinê û zarokatiya wê li wir derbas dibe. Zextên dewletê li wir jî didomin. Leyla du salî bû bavê wê Cumalî Şaylemez diçe Almanyayê.  Di 1994’an de Leyla bi 5 xwişk û birayên xwe re diçe Almanyayê. Du sal şûnde jî dayika wê û du xwişk û birayên wê diçin cem wan.

 

Tevli xebatên ciwanan bû

 

Leyla û malbata wê ku bêyî yek alavên xwe bigirin çûn Elmanyayê li bajarê Halle ya eyaleta Saksonya-Anhalt bi cih bûn. Bi salan têkoşîna jiyanê dan. Malbatê ligel dibistanên Alman, zarokên xwe ji çanda xwe dûr nehiştin û birin Komeleya Kurd. Leyla li wir di koma reqsê de cih digire.

 

 Hêrsa Leylayê ya li dijî zextên dewletê mezin dibe û wek Sakîneyê biryar digire ku hêrsa xwe biguhere pevçûnê. Leyla di 2008’an de bi awayekî çalak tevlî xebatên ciwanan dibe û 2 sal şûnde di 2010’an de tevlî PKK’ê dibe. Leyla piştî demekê ji ber pirsgirêkên tenduristiya xwe vedigere Ewropayê û xebatên ciwanan dimeşîne. 

 

Leyla piştî vedigere Ewropayê hîn aktiftir dixebite. Leyla li Hannoverê ji aliyê polîsên Alman ve tê şopandin. Ji ber zext û tacîzan Leyla ji bo meşandina faliyetan diçe Parîsê.

 

‘Armanca wê çûyîna çiyan bû’ 

 

Leyla di 2008’an de ji bavê xwe re nameyekê dinivîse û dibêje: “Armanca min çûyîna çiyayên azad bû, ez gihiştim armanca xwe.” 

 

Jinmama wê Nursel Şaylemez der barê Leylayê de wiha got "Leyla zarokek pir bi tevger bû. Nikaribû li cihê xwe rûne." Nurselê diyar kir ku hestra herî mezin a Leylayê ev bû ku biçûna Amedê, tevli Newroza Amedê bibûya.

 

Mîrateya ku van her sê berxwedêrên kurd hiştin, jinên kurd hilgirtin. Her meha çile ji bibîranînê wêdetir, bûye sembola berxwedanê.