NAVENDA NÛÇEYAN - Li bajarên Almanyayê bi hezaran kes bi meş û mîtîngan êrîşên li ser Rojava protesto kirin, hevgirtina xwe bi berxwedana gel re anîn ziman û bang li gelên Ewropayê kirin ku hevgirtinê nîşan bidin.

 

Kurdistanî û dostên wan li bajarên cuda yên Elmanyayê li dijî êrîşên li ser Rojava daketin qadan. Di xwepêşandanên ku li navendên bajarên cuda yên Elmanyayê hatin lidarxistin de, bi hezaran kesan alên Kurdistan, TEV-DEM’ê û pankart hilgirtin û bi dirûşmeyên "Jin, Jiyan, Azadî" û "Bijî berxwedana Rojava" berxwedana Rojava silav kirin. Kurdistanî bang li gelên Ewropayê kir ku hevgirtinê nîşan bidin.

 

Hamburg

 

Meclisa Gel a Demokratîk a Kurd a Hamburgê (DKHM) li ber Hauptbahnhof ê Hamburgê mîtîngek li dar xist û êrîşên çeteyên HTŞ’ê yên ku ji hêla Tirkiyeyê ve têne piştgir kirin li ser Rojava û Bakurê Rojhilatê Sûriyeyê protesto kirin. Di nav wan de Konseya Jinan a Rojbîn, TCŞ (Parêzvanên Şoreşa Tirkiyê), enternasyonalîstên Alman, rêxistinên jinan ên çepgir û sosyalîst û kesên ji Kurdistanê hebûn, bi hezaran kes beşdarî mîtîngê bûn.

 

Dovîzên ku balê dikişînin ser komkujiyên ku ji hêla çeteyên HTŞ’ê hatin hildan. Çalakî bi deqeyek rêzgirtinê dest pê kir.

 

Parlamentera berê ya HDP’ê Sevahir Bayindir diyar kir ku êrîşên li ser Rojava yekîtiya neteweyî di navbera Kurdan de xurt kir û got: "Ev yekîtî dê textên hemû dîktatoran hilweşîne. Rojava hêviya bajaran,Arînan û Denîzan e. Em ê vê hêviyê bidin jiyîn. Hêzên navneteweyî dixwazin Rojhilata Navîn bixin nav tariyê, lê ew bi berxwedana Kurdan nizanin. Ev seferberî wê bi dawî nebe, em ê bi ser bikevin. Bijî yekîtiya Kurdistanê!"

 

Parlamenterê berê yê HDPê Îdrîs Balûken jî got, "Destketiyên li Rojava dibin hedefa komployeke navneteweyî. DAÎŞ berê nekarîbû vê yekê bike. Hêzên ku nirxên mirovahiyê diparêzin di vê pêvajoyê de derketine pêş. Divê gelên Ewropayê li kêleka gelê Kurd bisekinin. Ger dewlet di van polîtîkayên qirêj de alî digire, divê gel bi hev re tevbigerin da ku wan polîtîkayan biguherîni.”

 

Mîtîng bi dirûşme û sirûdan bi dawî bû.

 

Leverkusen

 

Kurdên li Leverkusenêji bo protestokirina êrîşên li ser Rojava meşek li dar xistin. Çalakî li Opladenê bi deqeyek rêzgirtinê û sirûda neteweyî dest pê kir.. Endamên Navenda Civaka Demokratîk a Kurd a Leverkusenê di tevahiya meşê de çalakiyên agahdarkirinê lidar xistin; sê kesan serdana dehan deverên bajêr kirin ji bo raya giştî li ser êrîşên li Rojava agahdar bikin.

 

Meş bi mîtîngek li Leverkusen Mitte bi dawî bû.

 

Aachen

 

Komeleya Gelê Kurd a Aachenê ji bo protestokirina êrîşên barbar ên dewleta dagirker a Tirk, HTŞ û çeteyên DAÎŞ'ê li dijî gelê Rojava  mîtîng û meş li dar xist.

 

Çalakî li ber Meclîsa Gelê Kurd a Aachenê bi beşdariya bi hezaran Kurdistanî û çepgirên ciwan ên Antîfa dest pê kir. Di tevahiya meşê de, broşûrên agahdar li ser rewşa Rojava û bêdengiya dewletên navneteweyî hatin belavkirin. Meş dema ku gihîşt Elisenbrunnen a li navenda bajêr veguherî mîtîngê.

 

Di axaftinan de daxwaza rawestandina êrîşên li dijî gelê Kurd hate kirin û hate diyarkirin ku divê cîhan destkeftî û rûmeta gelên li Rojava biparêze.  Di çalakiyê de, banga beşdarbûna xwepêşandana ku dê roja Şemiyê 24’ê Çile saet 14:00an li Deutzer Werft a Kolnê were lidarxistin hate kirin

 

Heillbronn

 

Li Heilbronn a Elmanyayê, ji bo protestokirina êrîşên çeteyên HTŞ’ê yên girêdayî dewleta Tirk ve mîtîngek hate lidarxistin. Bi sedan Kurdistanî û dostên wan li Kiliansplatzê kom bûn û dirûşmeyên "Bijî Berxwedana Rojava", "Bijî Berxwedana Kobanî", "Bijî Rêber Apo", "Terorîst Erdogan", "Terorîst Colanî" û "Jin, Jiyan, Azadî" berz kirin.

 

Di axaftinan de li ser yekîtiya Kurdan hate rawestandin û bêdengiya welatên Ewropayê hate rexnekirin. Gelek jinên ji bo berxwedana xwe li dijî çeteyên HTŞ’ê nîşan bidin, porê xwe hûnandin. Çalakî dê sibê saet 14.00’an de bi meşa ku li Theresienwiese were destpêkirin, berdewam bike.

 

Munster

 

Gelê Kurd bi rojan e bi meş û xwepêşandanan piştgiriyê dide Rojava, îro kolanên Munsterê tijî kirin. Xwepêşandan bi pêşengiya Ciwanên TCŞ’ê ya Munster, Tevgera Jinên Kurd, meclîsa herêmî û dostên Kurdan, bi ddeqeyek rêzgirtinê dest pê kir.

 

Di xwepêşandanê de, jinan porê hev hûnandin da ku peyama hevgirtinê bişînin li hember êrîşên nemirovane yên li dijî şervanên jin ên Kurd li Rojava. Xwepêşandan bi coşek mezin berdewam kir, tekezî li ser yekîtiya civakî û piştgiriya berxwedana Rojava kir.

 

Saarbrucken

 

Xwepêşandana ku ji aliyê Navenda Civaka Demokratîk a Kurd ve hate organîzekirin, bi hezaran kes li dijî êrîşên li ser Rojava nerazîbûn nîşan dan û yekîtiya neteweyî û berxwedana gelê Kurd silav kirin.

 

Meş li Landwehrplatzê bi beşdariyeke coş dest pê kir. Ji Meclîsa Saarbrucken a PYD’ê Daxil Îbrahîm berxwedana Şêxmeksûd a Helebê bi bîr xist û diyar kir ku fermana dawîn a ku ji hêla Şehîd Fermandar Ziyad ve ji gelê Kurd re hatiye dayîn "berxwedan" bû.

 

Di mîtîngê de, Florian Spaniol (Die Linke Saar), Eva (Jin Rojava Diparêzin), Lisa (Connact Saar), û Rojbîn (Kare-Dervw) jî peyamên hevgirtina enternasyonalîst ragihandin.

 

Wuppertal

 

Li Wuppertal a Almanyayê Kurdistanî li dijî êrîşên li ser Rojava xwepêşandanek girseyî li dar xistin. Bi hezaran kes ji bo protestokirina êrîşên çeteyên HTŞ’ê ku ji hêla Tirkiyeyê ve têne piştgirîkirin, li hev civiyan û hêrsa xwe bi berzkirina dirûşmeyan anîn ziman.

 

Di axaftinan de, êrîş û komkujiyên li Rojava bi tundî hatin şermezarkirin û hate diyarkirin ku berxwedan û hevgirtina gelê Kurd dê berdewam bike. Girseyê bang li civaka navneteweyî kir ku li hember tiştên ku li Rojava diqewimin bêdeng nemînin.

 

Berlîn

 

Li paytext Berlînê jî Kurdistanî û dostên wan ji bo protestokirina êrîşên komên girêdayî hikûmeta demkî ya Sûriyeyê li ser Rojava û şandina peyama hevgirtinê li hev civiyan. Bi hezaran kes beşdarî xwepêşandanê bûn, alên YPG û YPJ hilgirtin, dirûşm berz kirin û bang li Yekîtiya Ewropayê kirin.

 

Xwepêşandan bi dirûşm û peyamên hevgirtinê bi dawî bû.

 

Dresden

 

Li Dresden a Almanyayê Kurdistanî û dostên wan ji bo protestokirina êrîşên li ser Rojava û peyama hevgirtinê bişînin li hev civiyan. Di axaftinan de hat gotin ku tiştê li Rojava diqewime sûcek li dijî mirovahiyê ye û divê Yekîtiya Ewropayê bêdeng nemîne.

 

Çalakî bi berzkirina dirûşmeyan bi dawî.

 

Koln

 

Li Koln a Elmanyayê bi hezaran Kurd û enternasyonalîst ji bo protestokirina êrîşên li ser Rojava ji hêla DAÎŞ, HTŞ û komên ku ji hêla dewleta Tirkiyeyê ve têne piştgirîkirin meşiyan. Meşa ku niştecihên herêmê jî beşdar bûn, ji Heumarkt ber bi Neumarkt çûn û paşê dîsa heta Heumarktê meşiyan.

 

Hunermend Diyar Dêrsim û Hevserok Sidar Yıldız di çalakiyê de axaftin kirin. Ji çar perçeyên Kurdistanê mafê axaftinê girtin û bal kişandin ser gefên li ser Rojava.

 

Lubeck

 

Li bajarê Lubeckê yê Almanyayê li dijî êrîşên li ser Rojavayê Kurdistanê meşek girseyî ya protestoyî hate lidarxistin. Kurdistanî û dostên wan ji bo êrîşan protesto bikin û hevgirtinê li Kohlmarktê kom bûn.Piştre girse ber bi Korkmarktê ve meşiya. Di meşê de dirûşmeyên "Bijî Serok Apo", "Şehîd namirin", "Jin, Jiyan, Azadî", "Bijî QSD" û "Rojava Rojhilat e, Kurdistan yek welat e" hatin berzkirin.