ÊLIH - Li Êlihê jî bo Gulistan Tara û Hêro Bahadîn bi pêşengiya MKG û DFG'ê merasîma bi bîr anînê hat lidarxistin. 

 

Li ser gora rojnamevan Gulistan Tara, ji bo Gulistan Tara û Hêro Bahadîn ên ku di 23'yê Tebaxa 2024'an de li Silêmanî, Başûrê Kurdistanê, di êrîşa hewayî ya Tirkiyê de jiyana xwe ji dest dan, merasîmek bîranînê hate lidarxistin. Ji aliyê Komeleya Rojnamevanên Jin ên Mezopotamyayê (MKG) û Komeleya Rojnamevanên Dîcle Firatê (DFG) ve hat organîzekirin. Malbata Gulistan Tara, MEBYA-DER'ê, Tevgera Jinên Azad (TJA), Rêxistina DEM Partiyê ya Êlihē û gelek rojnamevan beşdarî merasîma bîranînê ya li Goristana Tilmerçê bûn.

 

Xwişka Gulistan Tara, Fatma Ulkem Tekik Îsen, axivî û kesên ku di têkoşîna azadiyê de jiyana xwe ji dest dane bi bîr anî û got, "Ez di şexsê Gulistan û Hêro de hemû şehîdên xwe bi bîr tînim. Ew bûn gulên Tebaxê û em ê her tim şopînerên wan bin."

 

'Ew pêşeng bûn'

 

Seroka MKG'ê Roza Metîna di bîranînê de axivî û got, "Wan rojnamegerî wekî rêya têkoşîn û ronakbîriyê hilbijartin. Wan mafên jin û zarokan parastin. Wan li hember zilmê li ber xwe da. Wekî du pêşengan, wan qet serî netewand. Gulistan Tara di temenê ciwaniyê de tevlî têkoşînê bû. Wekî çapemeniya azad, em ê her tim wan bi bîr bînin. Pêvajoya Aştî û Civaka Demokratîk a ku em tê de ne bi saya hewildanên şehîdên azadiyê heye. Em ê mîrateya ku wan ji me re hiştin biparêzin."

 

'Em ê bi qelemên xwe li pey rastiyê biçin'

 

Roza Metîna bal kişand ser rola xebatkarên çapemeniya azad di têkoşîna rastiyê de û destnîşan kir ku ew ji ber vê sedemê hatine hedefgirtin. Roza Metîna got, "Naiım Daştan, Cîhan Bîlgîn, Nujiyan Erhan, Deniz Fırat, Şîlan Aras ji ber ku wan rastî parastin hatin hedefgirtin. Li hember vê yekê, em ê bi pênûsên xwe li pey rastiyê biçin. Erka me ya herî mezin ew e ku em wan bi bîr bînin û mîrateya wan biparêzin. Em soza xwe dubare dikin; em ê hewildan û bîranînên wan biparêzin."

 

Merasîma bîranînê bi dirûşma "Şehîd namirin" bi dawî bû.