ENQERE - Hevserokên Giştî yên DEM Partiyê Tulay Hatîmogûllari û Tuncer Bakirhan bi nûnerên dîplomasiyê yên 31 welatan re hatin gel hev. Di hevdîtinê de rola Abdullah Ocalan a di çareseriya pirsgirêka kurd de û mijara tecrîdê hate axaftin. 

 

Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan, bi nûnerên Delegasyona Yekitiya Ewropayê (YE), Almanya, Fransa, Awûstûrya, Spanya, Belçîka, Çekya, Yewnanistan, Portekîz, DYA, Ingilistan, Brezîlya û gelek welatên din re li Enqereyê hatin gel hev. 

  

Hevberdevkên Komîsyona Têkiliyên Derve ya DEM Partiyê Ebru Gunay û Berdan Ozturk hevdîtin organîze kirin. Tulay Hatîmogûllari di hevdîtinê de wiha got: “Di halê hazir de peywira dikeve ser milê me tevan ew e ku ji bo pêvajoyeke aştiyane ku hemû derdor tê de cih bigirin dest pê bike û rêveberî li gorî vê teşe bigire.” 

 

'Ewil divê tecrîd were rakirin'

  

Bi domdarî Tulay Hatîmogûllari bal kişand ser êrişên li dijî Bakur û Rojhilatê Sûriyeyê û got ku modêla Kurdan ava kirî ji bo çareseriyê modêla herî rasteqîn e û da zanîn ku êriş ji bo tunekirina vê modêlê tên kirin. Tulay Hatîmogûllari, wiha domand: “Divê statûya kurdan were naskirin û derfet bê dayin ku bi gelên din re wekhev bijîn.”

 

Tulay Hatîmogûllari got ku DEM Partî ji ber êriş û komkujiyên li dijî Elewiyan ên li Sûriyeyê fikaredar e. 

  

Tulay Hatîmogûllari, anî ziman ku Tirkiye li gorî biryarên DMME û AYM’ê tevnagere lewma Hevserokên Giştî yên HDP’ê yên berê Selahattîn Demîrtaş û Fîgen Yuksekdag nayên berdan û xwest ku ji bo bidawîbûna bêhiqûqiyan ji ewil tecrîd were rakirin. 

 

'Abdullah Ocalan xwedî roleke girîng e'

  

Hevserokê Giştî Tuncer Bakirhan jî qala geşedanên siyasî kir û ev tişt anî ziman: “Îktîdara Tirkiyeyê cisaretê ji rêveberiyên cîhanê digire û zexta li ser muxalîfan zêde dike.” Tuncer Bakirhan, xwest ku di mijara Demîrtaş, Yuksekdag, Atalay û Kavala de gav bên avêtin. 

 

Tuncer Bakirhan, bal kişand ser nîqaşên piştî 1’ê Cotmehê û axaftina xwe wiha qedand: “Nîqaşên erênî ne. Tevî van nîqaşan jî qeyûm tên tayînkirin. Birêz Abdullah Ocalan di çareseriya pirsgirêka kurd de xwedî roleke girîng e û ev rol ji hêla partiyeke weke MHP’ê ve jî hatiye qebûlkirin. Lewma divê tavilê tecrîd were rakirin.”