AMED - Kitabê “Çîrokên Jinên di Zindanan de” ê 11 kitabê cinîyan zindanan de pê yeno, vejîya.

 

Kitabê “Çîrokên Jinên di Zindanan de” ke 11 hîkayeyê cinîyê zindanan de pê yeno, vejîya. No berardişêk ke bi ziwanê kurdkî yo 112 rîpelan pê yeno. Eynî wextî de destnuşteyê cinîyê ke hîkayeyê înan nê berardişî de est ê, nê berardişî de ca gêno. Berardişo ke  Weşanxaneyê Aramî de ame çapkerdiş, xebatêke hempar ê cinîyan o. 

 

No berardişo ke hem bi hemkarîya sazgehê sey; Komîteya Cinîyan ê PENê Kurdî, 

 

MED-DER, Komeleya Edebîyatê Kurdî, Enstîtuya Kurdî ya Amedî, Federasyonê Komeleyê Huqûq û Piştdayîşî yê Keyeyê Tepişte û Hukumwerdoxan ê Amedî ame çapkerdiş. 

 

Amadekarîyê kitabê “Çîrokên Jinên di Zindanan de” hetê rojnamegere û nuştoxe Roza Metîna ra ame kerdiş. Edîtorîya berardişê zî hetê Enîse Şîrin û Roza Metîna ra ame kerdiş. 

 

Kitabê “Çîrokên Jinên di Zindanan de” hîkayeyê Besê Ozer (Şiyar), Fatma Ozbay (Mirî Birîndar Nabin), Xanim Yildirim (Xezal û Av), Leyla Saraç (Zerya-Karwanê Meytan), Medya Yaklav (Mişkê), Melîke Kaya (Welatek), Mizgîn Ronak (Çîroka Duyem), Mulkiye Dogan (Hespên Hêviyê), Necla Yildiz (Rêwîtî), Suheyla Taş (Ji Xweliyê), ca gênê.

 

Kitabî de hîkayeyê 10 cinîyan ca gêno û taybetmendîyê nê berardişî zî o yo ke cinîyan binê şertê û mercê xidarî de zîndanî de nê hîkayeyan nuştê. 

 

Kapaxê kitabî de no nuşte ca gêno;  

 

“No kitab, bêrîkerdiş, xoverdayîş û hêvîya ke qelema cinîya kurde ya vejêna, ana têhet. Cinîya ke verê dêsê zindani bi qelema xo hemverê çinbîyayîş û zulmî şer kenê, bi hîkayeyê xo yê benê şahidê tarîxî xo.  

 

No berardişê hhempar ê yewindes hîkayeyê cîya pê yenê, tenê dejê şexsî eynî wextî de xoverdayîşê şarêk, 

têkoşînê azadîye yê cinîyan û roşnîya hemverê tarîyê zindanî meşrû keno. Cinîyê tepişteyî hemverê zext, înkar û zordestî bi qelema xo veng danê; hîkayeyê şarêk û cinîyê ke yenê waştiş bêveng bêrêverdayîş, nusenê. 

 

Nê rîpelan de xeyal, vînîbîyayeyî, hêvî û têkoşînê cinîyê tepişte est ê. Vengê nê zincîran derbaz keno û tarîx de notêk verdeno. 

Her çekûye gamêke ver bi xoverdayîşê her riste de gamêke ver bi azadîye yo. 

 

‘Çîrokên Jinên di Zindanan de’ tena berardişêk edebî nîyo, eynî wextî de şahidîyek o. No şahidîyê tarîxê cinîyan o. Cinîyê ke vîyartoxî û hêvîya ameyoxî gênê.