MERKEZÊ XEBERAN - Sosyolog û cigêrayoxe Mehsa Esadollahnejad û nuştoxe û açarnayoxe Şîrîn Kerîmî hetê Yewîneyanê Îstîxbaratê Muhafizanê Şorişê Îranî ra ameyî tepiştiş û berdîyayî cayêk nêdîyar.

 

Rejîmê Îranî zordarî, destbendkerdiş, tepiştiş, îşkencekerdiş û dardekerdiş hemverê cinîyan û kesanê ke vengê xo berz kenê domneno. Roja 2ê teşrîna peyêne, hêzanê asayîşî eşt serê keyeyê sosyologe û cigêrayoxe Mehsa Esadollahnejadî, ameye destbendkerdiş û tepişnayî. Wextê sereştişî de keyeyî de cigêrayîş ameyo kerdiş û dest dayê ser hacetê elektronîkî yê şexsî.

 

Seatanê sibayî yê eynî roje de, Yewîneyanê Îstîxbaratê Muhafizanê Şorişî, eşt keyeyê nuştoxe û açarnayoxe Şîrîn Kerîmî ser o û aye tepiştî. Dimayê cigêrayîşê keyeyî de kitab û hacetê elektrîkî ameyî arêdayîş û Şîrîn Kerîmî berdîya cayêko nêdîyar.

 

Serê sibayî rew eştî keyeyê aye ser

 

Goreyê raporo ke ame weşankerdiş, hêzanê asayîşî derûdorê saete 07:30 sibayî de, şîyê keyeyê Şîrîn Kerîmî, dimayê cigêrayîşan aye destbend kerdî. Heta nika zî nêzanê ke aye berdê ça, bi çi sûcî yena sûcdarkerdiş.

 

Mehsa Esadollahnejad ke serra 1989ine de ameya dinya, Îran de wareyê komelnasî de sey akademîsyen yena naskerdiş. Cigêrayîşê aye yê tewr zaf derheqê ‘Hêzê xeyal û têkilîyê mîyanê sîstemê komelî û sîyasetî’ de yê.

 

Şîrîn Kerîmî serra 1983ine de ameya dinya, zanîngeha Tehranî de wareyê komelnasî de lîsansê berzî kerda. Mîyanê berardişanê aye de ‘Suveşûn ra heta pey 50 serran: Romanê Suveşûnî de rexneyêk semedê rastî’ kitabê bi nameyê (Neşr-i Negah-e Moaser) ca gêno. Eynî wextî de berardişê fehmî muhîm yê sey Judith Butler û Afsaneh Najmabadî açarnayê ziwanê Fransî. Semedê rêzefîlmê bi nameyê ‘Semedê ciwanan kitabê felsefeyî’ feydeyîn bi.