Rozerîn Gultekîn

 

WAN - Îdarekara Merkezê Pêroyî yê OHDyî Ebru Demîrtepe raportê komîsyonê meclîsî ercna û va: “Rapor peynî yan zî netîce nîyo, rapor destpêk o. Esasê welatîbîyayîşê têduştî de ganî serrastkerdişî bêrê kerdiş. Heqê hêvîye ma rê nokteya felsefîyî de, semedê Aştî û Cimatê Demokratîkî zaf muhîm a. Ganî her kes berpirsîyarî bigîro.”

 

Vengê “Aştî û Cimatê Demokratîk” ser de yew serre vîyart û prosesî de zaf averşîyayîşî ameyî ciwîyayîş. Yew averşîyayîşanê înan, raporê 110 rupelî yê Komîsyonê Piştîdayîşê Millî, Bira-Wayîye û Demokrasîyê yê ke meclîs de ameybî awankerdiş bî. Raporo ke 7 beşan ra pê ameyêne, hetê eştişê gamê somutî de qelsîye hewênêno û heto bîn de nokteyê ke meclîs gamêka huqûqî bierzo de sey destpêk yeno ercnayîş.

 

Îdarekara Komeleya Huqûqnasanê Semedê Azadîye (OHD) Ebru Demîrtepe derheqê raporî de ercnayîş kerd.

 

‘Rapor peynî nîyo, destpêk o’

 

Ebru Demîrtepe rapor ercna û wina ard ziwan: “Raporê meclîsî, derheqê ke meseleyanê girêdayeyê problemê kurdî gêno dest, nê hetî de gamê somutî erzeno de, çîyêk zelal û qetî nîyano orte. Nê hetî de raporêk o ke rexneye rê akerdo û zaf hetanî de negatîf yeno ercnayîş o. La nê prosesê ma ci de, rapor nokteyêk muhîmî de yo. Çimkî rapor peynî yan zî netîce nîyo. Rapor destpêk o. Sebebê ke rapor gamê pozîtîf zî pêşnîyar keno û bi rexneyan dir sewîyeya verêne de ma nê raporî muhîm vînenê. Derheqê heqê hêvîye de tu çî derbas nêbeno. No kêmasî yo. Çimkî prosesî de pabebîyayîşê tewr pîl heqê hêvîye yê semedê Birêz Ocalan û eştişê gamê somutî bî. Yew hewcedarîyê prosesî zî no bî ke ganî ziwanê vatişî bivurîyo.”

 

‘Esasê welatîbîyayîşê têduştî de serrastkerdiş’

 

Ebru Demîrtepe eşkera kerd ke sîstemê bîyaye de hetê kêmar, şarê kurdî û muxalîfî planê peyêne de yenê verdayîş û va ke goreyê ruhê vengê “Aştî û Cimatê Demokratîkî” ganî serrastkerdişê huqûqî bêrê kerdiş û wina va: “Zaf praktîkê bêdemokratîk est ê. Semedê ke vernîya înan bêro girewtiş gamê tewr somutî desturê bingehênî de vurnayîş kerdê. Ganî desturê bingehênî etnîk pênasekerdiş ra dur bikewê. Ganî proses întîqalkerdişê zemînêk huqûqî bikero. Prosesî de rêxistine xo fesh kerd. La ma vînenê ke tu tesîrê hukmî nêkerd. Ganî êdî meclîs gamanê somutan bierzo. Ganî esasê welatîbîyayîşê têduştî de ke kurdan eleqedar keno serrastkerdişê qanûnî bêrê akerdiş.”

 

‘Bêserrastkerdişê qanûnî ganî nêweşê tepişteyî bêrê veradayîş’

 

Ebru Demîrtepe zî bale ant rewşa nêweşanê tepişteyan û va: “Ganî lezkî nêweşê tepişteyî bêserrastkerdiş bêrê veradayîş. Ma semedê heme tepişteyan û Birêz Ocalanî wazenê ke heqê hêvîye lezkî bibo. Heqê hêvîye ma rê nokteyê felsefîkî de, semedê Aştî û Cimatê Demokratîkî zaf muhîm o. Ganî her kes berpirsîyarî bigîro. Ganî ma heme berpirsîyarîyê xo goreyê ruhê prosesî bîyarê ca. Ganî heme rêxistinê huqûq û heqî ziwanê demokratîkbîyayîşî bişuxilnê û nê hetî de têkoşîn bikerê.”