Bêrîtan Tûnç-Nazlican Nûjîn Yildiz

 

ÎZMÎR - Dayîka Aştîye Peyrûze Kurt a ke Îzmîrî de ciwîyena, dîyar kerd ke Newroze demê verî ra heta nika yadkerdişê cinîyan de sey sembolê xoverdayîşî ya û va: “Ma demê zehmetî vîyarnayî, la ma qet hêvîya xo vînî nêkerd; ma do biresê rojê roşnêran.”

 

Her xoverdayoxê ke hemverê zordarîya Dehaqan sere wedarna, adirêko ke tavistêne estbî. Manaya Newroze ya na herrî ser o hem roşan, hem xoverdayîş a. Newroze nameyê têkoşînê hemverê çinkerdiş, binpaykerdîş û zordarîyan a. Hîkayeyê bi seyan cinîyanê ke cepheyê nê têkoşînî de ca girewtî est ê. Newrozê ke zafê reyan bi coş û kelecan ameye pîrozkerdîş, zafê reyan bi adirê wey kerdî bî Newroze. La yew çîyê ke nêvurîya têkoşîn bî ke sey mîras girewtî.

 

Dayîka Aştîye Peyrûze Kurt a ke mecbur menda herra xo ra koç bikero û Îzmîr de bica bî, adirê Newroza herra xo ard Îzmîr û yadkerdişanê Newroze yê ke xo vîr ra nêkena, qal kena.

 

Newrozê ke hemverê zordarîyan ameyî pîrozkerdîş

 

Peyrûze Kurt dîyar kerd ke di tutê aye têkoşînê azadîye de dinyaya xo bedelnayî û va her di tutanê aye şewa Newroze bi cilê xo yê ke dayîne verê sereyê xo rakewtêne û va: “Pêwa heme zehmetîyan ma Newroze bi bawerîyêk pîl pêşwazî kerdêne. O dem Newroze weş bî. Ma bi coş û hêvîya aştîye ameyî nê rojan. Newrozêka ke qet xo vîr nêkena hîkayeya aye est a. Ma tersayî; ma va do destûr nêdê ma pîroz bikerê la zaf weş û serkewte vîyart. Serre bi serre weşêr bî. Pêwa zehmetîyan ma hêvîya xo vînî nêkerd. Ma zanayîne ke rojê weşî vernîya ma de yê. Serekê ma kîşte ma de bo ma do zaf kêfweş bê. Ma azadîya ci wazenê. Ma wazenê Newrozan de kîşta ma de bo.”

 

‘Bi adirê bedenê înan roşnayî virazîya’

 

Peyrûze Kurt Newroza 1992ine ya Îzmîrî zî wina va: “Serra ke Rahşan Demîrel bedenê xo da verê adirî, Newroze ma rê bi xemgînî vîyarîya. Wexto ke ma şîyîne meydanê Newroze bi coş û kelecan ma ameyîne têhet. La o wext ma xemgîn bîyî. Rahşane bedenê xo da verê adirî û dejê ma yê verî ard vîrê ma. Şehadetê Rahşane newe bî û nê semedî ra kêfa ma çinbî. Ma nêwazenê tu tutê ma bedenê xo bidê verê adirî. Bi adirê bedenê înan ma resayî roşnayî. Vernîya şarê kurdî abî. Rayîrê aştî û azadîye abî.”

 

 

Ma bi hêvîyêk pîl semedê Newroze xo amade kenê

 

Peyrûze Kurt va ke pêwa zordarîyan bawerîya înan bi aştî û azadîye est a û wina va: “Mi di tutê xo vînî kerd la tu dayîkî nêwazenê tutanê xo vînî bikerê. Ma Newroza 2026ine bi hêvîyêka pîl pêşwazî kenê û xo amade kenê. Ma Newroza serekê xo pîroz kenê. Ma Newroza Şehîd Mazlûm Dogan, Zekiye Alkan, Rahşan Demîrel, Ronahîyan, Berîvanan pîroz kenê. Ma yê şarê kurdî yê dayîkanê Aştîye, yê Arîn Mîrkanan, yê Salîh Musliman pîroz kenê. Ez Newroza şervanê azadîye pîroz kena, şarê ma yê welatê bînan de pîroz kena. Newroza vernîya ma zaf muhîm a. Hêvîya ma na ya ke na Newroze bibo Newroza aştî û azadîye.”

 

Peyrûze Kurt qiseykerdişê xo wina qedêna: “Ma bi coş û kelecanêk pîl Newroze pêşwazî kenê. Sebebê nê zî serrgêra vengê Rayberê Şarê Kurdî ya. Çekî ameyî veşnayîş. Dayîkî semedê aştîye hewl danê. Ma tu dejî xo vîr nêkerdê. La ma wazenê proses pozîtîf biherikîyo û tu kes nêmiro, aştî bêro. Wa tepişteyî bêrê veradayîş. Şarê kurdî azadîya Rayberê xo wazeno.“