Derya Ren

 

RIHA - Hevala zarokatiya Rêberê Gelê Kurd Abdullah Ocalan Elîf Bindal bi bîranînên xwe yên zarokatiya Rêberê Gelê Kurd Abdullah Ocalan re rojbûna xwe pîroz kir.

 

Amadekariyên ji bo 4’ê Nîsanê rojbûna Rêberê Gelê Kurd Abdullah Ocalan didomin, îsal ku wê 76’emîn rojbûna Rêberê Gelê Kurd Abdullah Ocalan were pîrozkirin, ji hemû pêkhateyan bi taybet jin wê li navenda navçeya Xelfetî ya Riha û Amara ya ku Rêberê Gelê Kurd lê ji dayik bûye çalakiyan li dar bixin. Meşa ku duh ji Amedê ji aliyê Meclîsa Ciwanan a Partiya Wekheviya û Demokrasiyê ya Gelan (DEM Partî) ve hatibû destpêkirin dewam dike, li Amara ya ku Rêberê Gelê Kurd Abdullah Ocalan lê ji dayik bûye, 4'ê Nîsanê bi kelecanek tê pêşwazîkirin. 

 

 

Li gundê Amara ku amadekariya pîrozbahiya 4'ê Nîsanê dike jî hevalên zarokatiya Rêberê Gelê Kurd Abdullah Ocalan hene. Rêberê Gelê Kurd ku jiyana xwe û civaka Kurd analîz dike, gelek caran li ser zarokatî û hevalên xwe yên zarokatiyê nirxandinan dike. Ev bîranîn û analîz di pirtûka bi navê "Rizgariya Demokratîk û Avakirina Jiyana Azad (Notên Îmraliyê)" de cih girtiye ku ji hevdîtinên Îmraliyê yên di salên 2013-2014'an de bi Rêberê Gelê Kurd Abdullah Ocalan re pêk hatiye.

 

Rêberê Gelê Kurd li ser Elîf Bîndal û Hesen Bîndal ên ku di pirtûkê de hatine binavkirin van analîzan dike: "Yekane rizgarî azadî ye. Hêj di zarokatiya xwe de min şêwaza şer a dayika xwe şermezar dikir. Min di zarokatiya xwe de li Rihayê şervantiya namûsê çirandin. Wê demê min bi zarokên malbatê re têkilî danî. Dijminê me bûn û diviyabû me hevdu nedîtiba.

 

 

Li gorî wê kevneşopiyê diviyabû ku ez di 15 saliya xwe de bimirim. Min dixwest bijîm û îdealên xwe pêk bînim. Min li ser vê mijarê ferzkirina malbatê qebûl nekir, min namûs xwe çirand.

 

Dema ez zarok bûm, bi Hesen û Elîfê re hevaltiyek me taybet hebûn. Hêviya min ji min ew bû ku dema ez mezin bûm bi wan re şer bikim û tola wan hilînim. Ez difikirîm ka ez çawa dikarim di wî temenî de pêşî li vê yekê bigirim. Ez sê, pênc, deh salan xebitîm û ev nakokî ji holê rakir."

 

Têkildarî 4’ê Nîsanê Elîf Bindal û xwişka Hasan Bindal Elîf Kurucu ji JINNEWS’ê re axivîn.

 

Elîf Bîndal, diyar kir ku wê di zarokatiya xwe de bi Rêberê Gelê Kurd Abdullah Ocalan re lîstik lîstiye û got wiha dest bi axaftina xwe kir: "Ez tercih dikim wek zarokatiyê de navê Rêberê Gelê Kurd bînim ziman. Me bi Evdila (Abdullah Ocalan) re lîstik dilîst. Evdila qet ranawestiya. Zarokên gund li dora xwe kom dikirin. Ez di temenekî biçûk de hatim zewicandin. Piştî zewacê ez vegeriyam malbata xwe, Evdila hat û ez vexwendim lîstikê. Ez çûm û bi wan re lîstîk list. Hasan Bindal kurê apê min bû hevalê Evdila bû. Me hinek lîst û dû re ez neçar mam ku biçim malê." 

 

 

Elîf Bindal, anî ziman ku bi salan e li hemberî Gelê Kurd polîtîkayên tunehesibandinê tê meşandin û wiha bi lêv kir: "Beriya derketina Evdila jî zilm li gelê kurd dihat kirin. Dibêjin dê pêvajoyeke nû dest pê bike û aştî çêbibe. Xwezî tiştekî wiha bibûya, herî kêm neviyên me tiştên ku em nabînin bibînin. Ez Evdilayê silav dikim, ez rojbûna wî û cejna wî pîroz dikim." 

 

Elîf Kurucu anî ziman ku wê 4'ê Nîsanê pîroz dike û diyar kir ku 7'ê Nîsanê roja ji dayikbûna Hasan Bindal e û axivî: "Apo û birayê min tu carî dest ji hevaltiya xwe bernedan. Apo tevî hemû şert û mercên zindan û tecrîdê li ber xwe dide. Em dixwazin azadiya fîzîkî ya Apo pêk were. Em her tim alîgirê aştiyê ne. Ez gulên ji baxçe berhev kirine diyarî Rêberê Gelê Kurd Abdullah Ocalan dikim."