COLEMÊRG - Dayîkê Aştîye yê Geverî dîyar kerdî ke badê vengdayîşê Rayberê Şarê Kurdî Abdullah Ocalanî PKK’yî adirbest îlan kerdo û vatî: “Bawerîya ma ya bi aştîye sere de serekê ma rê û badê zî tutê ma yê ke bi serran o têkoşîn kenê rê yena.”

 

Paştdayîşê semedê vengdayîşî tarîxî yê "Aştî û Komelê Demokratîkî" yê Rayberê Şarê Kurdî Abdullah Ocalanî dewam kenê. Badê vengdayîşî û îlankerdişê adirbestî pawemendişê ke dewlete zî gamanê somutan bierzo, vejîya vernî.

 

Dayîkê Aştîye yê Geverî derheqê babete de qisey kerdî û vatî, ganî dewlete gaman bierzo.

 

‘Ganî dewlete gaman bierzo’

 

Emîne Atak dîyar kerd ke badê wendişê mektuba Rayberê Şarê Kurdî Abdullah Ocalanî hêz û moralêk pîl girewtê û wina vat: “Ez sey dayîkêke gerîla û tepişte mesaj tesîrêk pîl mi ser o kerd. Zaf kelecanî bîya û bermaya. Werrekna na game tewr lez biameyîne eştiş. PKK’yî adirbest îlan kerd la ganî dewlete zî gaman bierzo. Ganî tepişteyê sîyasî bêrê veradayîş ke ma bi aştîye bawer bikerê.”

 

‘Waştişê ma azadîya serekî ya’

 

Emîne Atak wina peynî kerd: “Şarê kurdî bi serran o aştîye de israr keno. PKK’yî adirbest îlan kerd. La dewleta tirkan hema zî her cayî bombavaran kena. Şarê kurdî pêwa pêro zilm û qirkerdişî aştîye wazeno. Waştişê ma azadîya serekê ma ya.”

 

‘Wa aştî bêro na herre ser o’

 

Mehsîma Yaşar zî wina ard ziwan: “Di tutê mi tepişte yê. Ez nê mesajî ra zaf keyfweş bîya. PKK’yî adirbest îlan kerd. Ma zaf keyfweş bîyî. Ganî mergî nêvirazîyê, aştî pê bêro. Ma wazenê aştî bêro na herre ser. Ma wazenê veng û dîmenê serekê xo bivînê.”

 

Fatma Temel zî dîyar kerd ke bi gama ke Rayberê Şarê Kurdî Abdullah Ocalanî eşt a, aştîya Kurdistanî do bi paştdayîşê dayîkê aştîye xurt bibo û vat, no semedê pêrûne îmkanêk o û ganî dewlete êdî gaman bierza.