STENBOL - Dayîkê Şemeyî aqûbetê Hasan Ocakî ke  21ê Adara 1995ine de destbend bî û cenazeya ey goristanê bêkesan de ame vînayîş, pers kerdî û vatî, "Dosya çarçewaya sûcê hemverê merdimayî de biercnê. Wezîfeyê xo yê cipersayîşî û dozgerî bi tesîrêk pê bîyarê."

 

Dayîkê Şemeyî/Merdimê Şemeyî, ke her hewte semedê aqûbetê merdimanê xo yê ameyê vinîkerdiş yan zî destbendkerdişan de ameyî qetilkerdiş, bipersê Meydanê Galatasarayî de yenê têhet û waştişê muhakemekerdişê kerdoxan kenê, hewteyê 1043ine de zî meydan de cigêrayîşê edaletî bî. Çalakî de  

aqûbetê Hasan Ocakî ke  21ê Adara 1995ine de destbend bî û cenazeya ey goristanê bêkesan de ame vînayîş, pers kerdî û metnê eşkerayîye hetê Îkbal Eren ra ame wendiş. 

 

Îkbal Eren, qalê Hasan Ocakî kerd û vat: "Îşkenceyêk giran Hasan Ocakî rê ame kerdiş û cenazeya ey Goristanê Bêkesan yê Altinşehîrî de ame vînayîş. Semedo ke keye huqûqî mîyanî ra netîce nêgirewt, muracatê Dadgeha Heqê Merdiman ê Ewropa  (DMME) kerd. Serra 2004ine de DMME'yî Tirkîya mehkûm kerd û qerar da ke derheqê vînîkerdiş û merdişê Hasan Ocakî de cipersayîşêk zêde û bi tesîr nêameyo kerdiş. 30ine serrgêra vînîkerdiş û qetilkerdişê ey de ma reyke bîn venga selahîyetdaran kenê. Goreyê qanûnê mîyanneteweyî têbigêrê. Dewa sey sûcê merdimayî biercnê. Wezîfeyê xo bikerê ke cipersayîş û dadgerîyêk bi tesîr bikerê," 

 

Waya Hasan Ocakî, Masîde Ocak zî wina qisey kerd: "Dayîka mi, mi ra waşt ke ez silamanê xo bikerî. Aye zaf hes kerdêne ke biameyîne tîya. La vindarnayîşê verê barîyeran aye xemgîn keno. Hema zî ma ra vana, 'Bi des serrî yo ke şima meydan de yê, ma wina amenetê şima nêkerdibî.’ Ma tîya yê, semedo ke ma 30 serrê xo qal bikerê. Ma do senîn 30 serrê xo vajê? 30 serrî yo her ke şino birînê ma gonî benê.”

 

Çalakî bi qerenfîlê ke meydan de ameyî verdayîş, peynî bî.