Memîhan Zeydan

 

WAN - Endamê meclîsê şaredarî dîyar kerd ke bi tayînkerdişê qeyûman ê semedê şaredarîya Bajarê Pîlî a Wanê, ewil projeyê cinîyan ameyê betalkerdiş.

 

Badê ke 3 serrî û 9 aşmî cezaya zîndanî Hemşaredarê Bajarê Pîlî yê Wanî Abdullah Zeydan rê ame birnayîş, 15ê sibate de zî qeyûm tayînê şaredarî ame kerdiş. Eynî saetan de hemşaredar Abdullah Zeydan wezîfe ra ame girewtiş û waliyê Wanî Ozan Balci ame tayînkerdiş. Ozan Balci ke senî ame wezîfe pêro projeyê 10 aşman de semedê cinîyan amebî amadekerdiş, betal kerd.

 

Endamê Meclîsê Şaredarîya Bajarê Pîlî ya Wanî derheqê babete de qisey kerdî.

 

‘Xeylêk proje û îhale ameyî betalkerdiş’

 

Evîn Karahan tayînkerdişê qeyûmî ard vîr û vat:  “Senî ke qeyûm ame hêrişê projeyê cinîyan kerd.  10 aşman de ma semedê cinîyan xeylêk proje kerdî cuye. Qertê jînkart ma caard. Endamê meclîsî yê AKP’yî zî ray dayî. La badê ke qeyûm ame, ameyî betalkerdiş. Amancê nê qertî o bî ke cinî bi rehetî şêrê û bêrê. Xeylêk proje û îhaleyê bînî ameyî betalkerdiş. Şarê Wanî 31ê Adare de rayê xo dayî Abdullah Zeydanî û Neslîhan Şedale. Ma DEM Partî şaredarîyêke komelî hedef girewt. Semedê ma awanî çinî bo zî ma eşkenê şaredarîye bikerê. Ma şarê xo dir ê.”

 

‘No nêzdîbîyayîşê hemverê şarê kurdî yo’

 

Bêrîvan Polat zî dîyar kerd ke hîrê wextî yo qeyûmî yenê tayînkerdiş û wina vat: “Qeyûman vernê de destkewtişê cinîyan hedef girewt. Jinkart ame betalkerdiş. No hetê cinîyan de semedê ekonomî rehetî bî. Ma zaf zelal vînenê ke no dişminîyê hemverê cinîyan o. Pêwa nê xeylêk projeyê ma yê bînî ameyî betalkerdiş. Îradeyê şarî çin hesibnayî. Zîhniyetê qeyûmî ma matmayî nêverdeno. Ma zîhniyet zanê. La ma hemşaredaranê xo dir mîyanê şarî de yê.”

 

‘Cinîyan ra dest pêkerdî’

 

Nazmiye Acar zî wina qalî kerd: “Wan de semedê cinîyan wareyê xebate û îstîhdamî çin o. Ganî cinî keyeyan ra vejîyê û komelî bibê. Ganî bieşkê şêrê nêweşxaneyan. Ma semedo ke cinî rehet bikerê qertê jinkart vet. La hetê qeyûmî ra ame betalkerdiş. Ma waşt cinî bi rehetî keye ra vejîyê û xizmetê vurnayîşî bivînê. Ma pêro zîhnîyetê qeyûmî zanê. Ma do paştdayîşê semedê cinîyan dewam bikerê.”