STENBOL - DFG’yî semedê ronitişê vernî yê rojnamegere Eylem Babayîgît ke do 19ê adare de bêro organîzekerdiş, vengdayîşê paştdayîş û pawitişê rojnamegerîye kerd. 

 

Komeleya Rojnamegeran ê Dîcle Firatî (DFG) derheqê roniştişê dewaya rojnamegere Eylem Babayîgîte ke 20ê çeleyî heta nika Zîndanê Cinîyan ê Bakirkoyî de tepişte ya, vengdayîşê tewrbîyayîşî kerd.

 

Derheqê roniştişo ke do 19ê adare de 22yin Dadgeha Cezaya Giran ya Edliyeyê Stenbolî de bêro kerdiş, no vengdayîş kerd: “Rojnamegere Necla Demîr Arvas, Rahîme Karvar, Ahmet Guneş, Welat Ekîn, Vedat Oruç û Reyhan Hacioglû 17ê çeleyî de çarçewaya cipersayîşê merkezê ci Stenbol de ameyî destbendkerdiş û 20ê çeleyî de bi îdiayê ‘endamîya rêxistine’ ameyî tepiştiş. Rojnamegere Eylem Babayîgît zî 22yê çeleyî de tepişya. Rojnameger Ahmet Guneş, roja ke îdianameyê ey amebî amadekerdiş de ame veradayîş. Tarîxê roniştişê dewaya rojnamegere Eylem Babayîgît, Necla Demîr Arvas û Welat Ekîn dîyar bî la semedê qerarê bêrayetî yê dadgehe, tarîxê roniştişê dewaya rojnamegere Reyhan Hacioglû, Rahîme Karvar û Vedat Oruç hema nêameyî diyarkerdiş. 

 

Hema dîyar nîyo do her 3 meslegdarê ma do ça û key bêrê muhakemekerdiş. Semedê qerarê bêrayetî yê dadgehe, demê tepiştişî yê meslegdaranê ma bi hawayêk keyfî yeno dergkerdiş. Roniştişê dewaya meslegdara ma Eylem Babayîgît do 19ê adare de 22yîn Dadgeha Cezaya Girane ya Stenbolî de bêro kerdiş. Sey DFG, ma do roniştiş taqîb bikerê. Sere de rêxistinê meslegî, vengdayîşê ma semedê her kesî o yo ke roja çarşeme rojnamegerî bipawê û paştdayîş bidê.”