Elfazî Toral-Rozerîn Gultekîn

 

STENBOL - Cinîyê ke tewrê 3ine Konferansê Aştîye yê Rojhelata Mîyanên ê bi sloganê ‘Ma semedê aştîye vatişê xo vanê’ bîyî derheqê prosesî de ercnayîş kerdî û vatî: “Vengdayîşê 27ê sibate de ameyo kerdiş, her çiqas sey PKK’yî dir ameyo kerdiş bêro vînayîş zî no vengdayîş sazgehê komelê sivîlî yê Tirkîyaye yo. Waştişê aştîye, awankerdişê aştîye berpirsyarîyê her kesî yo.” 

 

Konfederasyonê Sendîkayê Kedkarê Îstîmlakî (KESK) bi sloganê ‘Ma semedê aştîye vatişê xo vanê’ 3ine Konferansê Aştîye yê Rojhelatê Mîyanên 15-16ê adare de Kadikoy de ame kerdiş. Konferans di rojî dewam kerd û xeylêk temsîlkarê sazgehê komelî, partîyê sîyasî û sendîka tewr bî. 

 

Cinîyê ke tewrê konferansî bîy derheqê prosesî de qisey kerdî.

 

Koordînatora Merkezê Cigêrayîşê Wareyê Polîtîkî yê Komelî Yuksel Genç vat, no proses her hetî ra cîya to û wina dewam kerd: “Têgêrayîşê kurdî û lîderê têgêrayîşê kurdî mîyanê prosesêk peynî de bîyo nîyê, sewîyeya têkoşînêk bîn de yê. No prosesê aştîye, nika prosesêk rêze de nîyo. No proses semedê ma newe zî nîyo. Waştişê çeke ronayîşî yê PKK’yî û xofeshkerdiş, 1999ine ra heta nika rojeva lîderê PKK'yî de bî. PKK’yî mabêne 1999 û 2004ine de gamê cidî eştî. Hewldayîşê cidî mojnayî. La Tirkîya gamanê lazimî nêeşt. Proses cidî nêgirewte. Bedelê nê zî ame dayîş.”

 

‘Vengdayîş semedê komelê Tirkîya yo’

 

Yuksek Genç bale ant serê vengdayîşê Rayberê Şarê Kurdî Abdullah Ocalanî û ganî dewlete berpirsîyarîyê xo ca bîyaro û vat: “Berpirsyarî kewena milê dewlete ser o. No vengdayîş her çiqas sey vengdayîşêk semedê PKK’yî bêro vînayîş zî, no vengdayîş semedê dewlete, sazgehê komelê demokratîkî û pêameyî, sazgeh û dezgeyan o. Nê semedî ra ganî her kes wezîfeyê ca bîyaro.”

 

Mutabakatê 8 madeyî!

 

Rojnamegere Hamîde Rencus zî wina qalî kerd: “Do dewlete kamci gaman bierzo? Do tepişteyî bêrê veradayîş? Do heqê ziwanî bêro dayîş? Hemverê feshkerdişê PKK’yî xeylêk çî yenê pawitiş. La hema dîyar nîyo, nîno zanayîş ke do şarê kurdî çi bidest bikero. Ameyîne texmînkerdiş ke wareyê Sûrîye de zaf bi tesîr bo û wina zî bi. Gamê somutî ameyî eştiş. Mabêne HTŞ û Mazlûm Ebdî de mutabakatê 8 madeyî ame îmzakerdiş û ame vînayîş ke caardişê yew tîpî eşkenê bivuryê.”

 

‘Paştdayîşê aktorê sîyasî muhîm o’

 

Endama Heyetê Îdareya Weqfê Aştîye Sevgî Înce zî wina vat: “Rojhelatê Mîyanên açaryayo gola gonî. Her cayî de şer est o. Ma nika noktayêk zaf muhîmî de yê. Nika aktorê sîyasî û partî paştdayîş danê prosesî. No paştdayîş muhîm o. Meseleya kurdî êdî meseleya dinya. Ma vînenê ke hem demê vîyarte de û hem zî nika xeylêk aktor û xeylêk rêxistinê sivîlî derheqê prosesî de dest bi munaqeşeyan kerdê ke no vengdayîş hawirdorêk ke komelê sivîlî bêveng ê û aştî nîna munaqeşekerdiş, yeno. Nê semedî ra ma mecbûr ê ke aştîye awan bikerê û waştişê aştîye  bikerê. Bêşik endîşeyî est ê la cewabê ci ma dir o.”