Memîhan Zeydan

 

WAN - Aktîvîsta TJA’yî Aynur Sarica derheqê tehlukeyê ke cinî wareyê mîtîngan de rî bi rî yenê û vat: “Wexto ke vînenê cinî destê yewbînan gênê, fam kenê ke vînî kerdê.”

 

Cinîyê ke her wareyê cuye de bi şîdet û caardişê bêhuqûqî dir yenê rî bi rî, wareyê mîtîngî zî semedê înan benê tehluke. Bi taybetî demê peyîn de Wan de şîdetê hêzê asayîşî yê hemverê cinîyan zêde bîyo. Wareyê mîtîngî de wexto ke yewîya cinîyan vînenê, nê çî tehluke vînenê.

 

Aktîvîsta Têgêrayîşê Cinîyanê Azadan (TJA) Aynur Sarica derheqê babete de qisey kerd.

 

‘Cinî do hem xo hem zî komelî azad bikerê’

 

Aynur Sarica da zanayîş ke verê ra şîdetê camêrdan cinîyan ser o dewam keno û vat: “Hemverê cinîyan de hêrişêk babeta vatişî ya. Hemverê nê de bêşik têkoşînê cinîyan dewam keno. Pêro wareyan de 8ê Adare, Newroze û pêro mîtîngan de hemverê cinîyan de hêrişê zîhnîyetê serdestî yê camêrdan destpê keno. Semedo ke zanê cinî hemverê zîhnîyetê serdestî, xo newe ra bîyaye kenê. Wexto ke cinî xo newe kenê, xo komelî ra zî azad kenê. Hemverê nê de hêrişê hemverê cinîyan zêde benê.”

 

‘Vernîya cinîyan padanê’

 

Aynur Sarica dewam de wina vat: “Nêverdenê ke ma sloganan biqîrê, renganê xo eşkera bikerê û bi hawayêk komî têbigêrê. Zîhnîyetê netew-dewlete bi hawayêk eşkera rayîr vernîya cinîyan padano. Nêwazenê cinî bêrê têhet û çîyêk awan bikerê. 8ê Adare de yewin çîyo ke vejîyeno orte, ablûqakerdişê cinîyan o. Wexto ke ma meydanan de vila bê zî, sey kome zî xebityenê, sîstem her hetî ra ablûqakerdişê ma dewam keno. Wexto ke vînenê cinî pîya qisey kenê, xo resnenê yewbînan, pîya şuxilênê. Nê semedî ra vernîya cinîyan de astengîyê pîlan vejenê. Cinî pêwa astengîyan peyser game nêerzenê. Ma xo nas kenê, ma wayîrê sloganê xo vejênê û ma do azadîya xo bidest bikerê.”

 

‘Tena slogan nê ma felsefe dinya rê vila kenê’

 

Aynur Sarica tewr peyîn wina vat: “Meydanê Mîtîngî de hemverê cinîyan, zîhnîyeto lêşin vejêno werte. Nêwazenê cinî bi rengê xo wareyan de ca bigîrê. 8ê Adare de cinîyan pîya sloganê ‘jin jiyan azadî’ berz kerd. La hewl danê ke vernîya nê padê. Ma cinî yê, ma do cuya xo awan bikerê û xo azad bikerê. Sloganêk nê, ma felsefe dinya rê vila kenê. Vernîya ma de Newroze est a. Newroze ruhê newe ya. Semedê aştî û azadî bar keweno milê cinîyan ser. Do cinî hem xo, hem komelî azad bikerê.”