STENBOL - Roniştişê ewilî yê dewa de, serrêke, 6 aşmî û 22 rojî cezaya zîndanî rojnamegere Eylem Babayîgîte rê ameye birnayîş. Eylem Babayîgîte eynî wextî de ameye veradayîş. 

 

Yewin roniştişê dewaya ke rojnamegere Eylem Babayîgîte bi îdiayê "endamîya rêxistine" ci ra yena muhakemekerdiş, 22yîne Dadgeha Cezaya Giran ya Edliyeyê Stenbolî yê Çaglayanî ame vînayîş. Komeleya Rojnamegeranê Cinîyan ê Mezopotamyaye (MKG), Komeleya Rojnamegeran ê Dîcle Firatî (DFG), Komeleya Cigêrayîşê Medya û Huqûqî (MLSA), endamê Basîn-Îşî yê DÎSK'î û keyeyê Eylem Babayîgîte beşdarê roniştiş ke Eylem Babayîgîtî amade bî, bîyî.

 

Eylem Babayîgîte pawitişê xo de sûcê xo ser qebûl nêkerd. 

 

Avûkate Nagehan Avçil zî da zanayîş ke muhakemekerdiş mudaxaleyê hemverê azadîya çapemenîye yo. 

 

Qerarê tehlîye 

 

Dadgehe bi sûcdarîya “propagandaya rêxistine” serrêke 6 aşmî û 22 rojî ceza Eylem Babayigite rê birna û qerarê veradayîşî da.