Rabîa Onver

 

WAN - Tayînkerdişê qeyûmî yê semedê şaredarîya Bajarê Pîlî ya Wanî, aşmêke derbaz bî û pêro projeyê ke hemşaredaran plan kerdibî, ameyî betalkerdiş. Hemşaredara Bajarê Pîlî ya Wanî Neslîhan Şedal ke qeyûm vera ci tayînî bî, dîyar kerd ke senî qeyûm ame projeyê cinîyan betal kerd û vat: “Sîyasetê qeyûmî û rejîmê qeyûmî do bi têkoşînê cinîyan vînî bikero."

 

Aşma vîyarte de qeyûm tayînê şaredarîya Bajarê Pîlî ya Wanî ame kerdiş û pêro projeyê ke hemşaredaran kerdibî dewre, betal kerdî. Projeyê JINKART, Qertê Paştdayîşê Komelî yê semedê cinîyanê feqîran amebî dayîş, projeyê tesîsê komelî yê berardiş û komelbîyayîşî, projeyê wareyê kultur, ciwan, cinî, îmar, awe, rayîr û kanalîzasyonan de ameyî betalkerdiş.

 

Hemşaredare Neslîhan Şedal ke qeyûm vera ci tayîn bî, derheqê babete de qisey kerd. 

 

‘Ma xeylêk proje ca ardî’

 

Neslîhan Şedal da zanayîş ke hîrê demî yo Kurdistan de îradeyê şarî yeno xespkerdiş, bi destê qeyûman pêro bîyayîşê cinîyan hedef yeno girtewtiş. Neslîhan Şedal wina vat: “Zîhnîyetê serdetî yê camêrdî her tim destkewtiş û bîyayîşê cinîyan hedef girewto. La hemverê nê de têkoşînî cinîyan her tim pîl bî. Ma zî sey têgêrayîşê cinîyanê kurdan, tîya bi perspektîfê azadîya cinî, ekolojîk û demokratîkî xeylêk xebatî ca ardî.”

 

‘Ma ewilî planê stratejîk awan kerd’

 

Neslîhan Şedal dîyar kerd ke qeyûman sîstemê hemserekî hedef girewto û wina vat: “Ma bi perspektîfê azadîya cinî, demokratîke û ekolojîk xeylêk xebatî kerdî. La qeyûmî ameyî û ewil nê projeyan vindarna. Wexto ke ma ameyî îdarekarî ma şaredarîya cinî laver berd û ma waşt ke bikerê komelî. Yewin çîyo ke ma kerd awankerdiş plansazîyê stratejîk yê cinî bi. Ma bi STK, dînamîkê cinîyan, komele û platformê cinîyan dir nê qerarî da.”

 

‘Ma bi astengîyan dir ameyî rî bi rî’

 

Neslîhan Şedal tewr peyîn wina vat: “Qeyûman cinîyan mahkumê hawira şîdetî kerdibî. Îstasyonê hetkarî ra bigîrê, heta xeta Alo Şîdetî, merkezê cuye yê cinîyan, wareyê berardeyê cinîyan, koperatîfê cinîyan amebî padayîş. Wexto ke ma ameyî, ma hewlda ke ma abikerê la ma astengîyê burokratîkî dir ameyî rî bi rî. Qeyûmî senî ameyî projeyê JINKART ke ma bica ardêne, betal kerdî. Sewbîna projeyê ma yê Sosyal Kart estbî. Ê zî betal kerdî. La ma vanê ke do rejîmê qeyûmî bi têkoşînê cinî vînî bikero. Ma cinî nê qebûl nêkenê û ma do têkoşînê xo dewam bikerê.”