
Îzmîr de cinîyan ra vengdayîşê Newroze
- 09:32 21 Adare 2025
- NAROJANE
ÎZMÎR - Cinî wayîrê Rayberê Şarê Kurdî Abdullah Ocalanî û waştişê azadîye yê şarê kurdî vejênê, vengdayîşê tewrbîyayîşê Newroze pêro kesan rê kerdî.
Do emser Newroza Îzmîrî 22yê Adare de bi sloganê ‘Rayberîya Azad Komelê Demokratîkî’ û ‘Semedê azadîye Newroza Komelê Demokratîkî’ Meydanê Gundogdu de bêro pîrozkerdiş. Cinîyan dîyar kerdî ke emser semedê Rayberê Şarê Kurdî Abdullah Ocalanî vejênê meydanan û Newrozê bînan ra cîyayîr bi coşêk pîl do pîroz bikerê. Cinîyan vengdayîşê tewrbîyayîşê Newroze pêro kesî rê kerdî.
‘Adirbesto yew het nêbeno’
Dayîka Aştîye Hediye Korkut wina vat: “Ma vengdayîşê serekê xo ra xeylêk keyfweş ê. La adirbestêk yew hetî nêbeno. Ganî dewlete gaman bierza. La ma vînenê ke ê tewr zêde hêriş kenê. Ma hemverê nê hêrişan û qirkerdişan ê. Ma şer nêwazenê, ma aştîye, têduştîye wazenê. Serekê ma destê aştîye derg keno. La ê sey ma nîyê. Ez sey dayîkêka kurde venga înan dana. Wa semedê aştîye gaman bierzê. Ma aştîyêke bi rûmet wazenê. Tutê ma semedê mergî nînê dinya.”
‘Bi cil û belgê xo tewr bibê’
Îdarekara Keyeyê Hunerî yê Jin Artî Belkisa Suleymanoglu zî dîyar kerd ke prosesêk tarîxî ra derbaz benê û wina vat: “Na Newroze do biba Newroza aştî û azadîye. Ma do zî bi reng, veng û deyîranê xo wareyan de bê û adir gur bikerê. Ma venga pêro cinîyan danê. Bi cil û belgê xo yê kurdî tewr bibê û ma adirê Newroze pîya geş bikerê.”
‘Newroze wina asan nêameya nê rojan’
Vesîle Turan dîyar kerd ke 52 serrî yo Îzmîr de ciwîyenê û vat, serranê 90î de nimite Newroze pîroz kerdêne û vat: “Birayê mi nimite adir tafînayne. La ewro ma bi asanî pîroz kenê. Semedê kurdan Newroze muhîm a. Ma wazenê ciwanê ma bêrê Newroze. Newroze wina asan nêameye nê rojan. Ganî her kes tewrê Newroza Îzmîrî bibo.”
‘Wa dayîkê leşkeran zî bêrê Newroze’
Maşalllah Ozmen zî wina vat: “Ma roşanê kurdan bi coş pîroz kenê. Ma her serre bi coş pêşwazî kenê. Ma cil û belgê xo danê xo ra. Newroza emserî muhîm a. Ma çareserîya meseleya kurdî wazenê. Wa gerîla, ne zî leşkerî bimirê. Ma Newroze xêrê gonîya şehîdan, bi xêrê serekî bidest kerd. Wa dayîkê leşkeran zî bêrê Newroze û aştî biwazê.”
‘Semedê cinîyan waştişê aştîye’
Marîa Agir zî dîyar kerd ke ê Newroze de semedê cinîyan aştî wazenê û vat, ê Newroza pêro kesî pîroz kenê.
Endama Meclîsê Cinîyan ê DEM Partî ya Îzmîrî Gul Ekîcî zî fikrê xo ard ziwan û dîyar kerd ke bi serran o pêwa zulmê şarê kurdî ser tewrê Newroze bena û venga pêro cinîyanê xoverdoyaxan kerd ke Newroze de bêrê têhet.