ANQARA - Endama MYK ÎHD’yî Nuray Çevîrmen derheqê vengdayîşê ‘aştî û komelê demokratîkî’ yê Rayberê Şarê Kurdî Abdullah Ocalanî de qisey kerd û vat: “Ganî pêro partîyê sîyasî aktîf û pozîtîf tewrê prosesî bibê. Ganî proses çarçewayêke polîtîkayêke heq û azadî esas gêna de laver şêro.”

 

Rayberê Şarê Kurdî Abdullah Ocalanî 27ê Sibate de venga ‘aştî û komelê demokratîkî’ kerdibî. Endama Heyetê Îdarekarî ya Merkezî (MYK) ya Komeleya Heqê Merdiman Nuray Çevîrmen derheqê vengdayîşî de ercnayîş kerd.

 

‘Ganî gamê demokratîkî bêrê eştiş’

 

Nuray Çevîrmen da zanayîş ke vengdayîşêk tarîxî û muhîm ameyo kerdiş û vat: “No vengdayîş do xeylêk wareyan de tesîrê pozîtîf bikero. Ganî her hetê komelî wayîrê vengdayîşî vejîyo û bi taybetî wezîfeyê pîlî dano milê pêro seran û heto tewr muhîm zî dewlet a. Ganî hetê komelî zî tewrê prosesî bibo û gamê demokratîkî bêrê eştiş.”

 

‘Ganî tecrîd bêro wedaritiş’

 

Nuray Çevîrmen vat, ganî rayapêroyî wayîrê prosesî vejîyo û vat: “Ma pawitoxê heqî demêk derg o vanê ke ganî tecrîdo giran bêro wedaritiş. Ma vengdayîş kenê û vanê, no huqûqî û merdimayî nîyo. Proseso newe dest pêkerd û semedo ke xebatî bi rêk û pêk bêrê kerdiş, ganî tecrîd bêro wedaritiş û pêvînayîşê avûkatan pê bêro. Ganî dewlete gaman bierzo.”

 

‘Polîtîkaya cezakerdişî babeta vatişî ya’

 

Nuray Çevîrmen dîyar kerd ke polîtîkaya cezakerdişî babeta vatişî ya û wina vat: “Vernîya her çî ganî tepişteyê sîyasî qetî bêrê veradayîş. Ewro Tirkîya de sîyasetmedar, huqûqnas û xeylêk kesê ke falîyetê rêxistinê komelî kenê, yenê padayîş. Wexto ke prosesê çareserî bibo, ganî tepişteyê sîyasî bêrê veradayîş.”

 

‘Ganî sererastkerdişê qanûnî bêrê kerdiş’

 

Nuray Çevîrmen wina peynî ard: “Ganî qetî TMK orte ra bêro wedaritiş. Ewro zîndanî bêrê vengkerdiş û badê demêk çarçewaya TMKyî de hûmara tepişteyab di qat zêde bibo. Nê semedî ra ganî sererastkerdişê qanûnî bêrê kerdiş. Ganî sererastkerdişê qanûnî komelî rê xizmet bikero. Semedo ke proses xira nêbo, mesuldarî kewena milê her kesî ser o.”