AMED - Heyetê ke bi Trena Aştîye ame Amed, bi coş ame pêşwazîkerdiş, nuştoxe Ayşegul Devecîoglû ke mîyanê heyetî de ca girewt zî vat, "Ma semedê vengê aştîye zêde bikerê û têkoşînê hempar hîra bikerê, tîya yê.”

 

Heyetêk Înîsiyatîfê Komelî yê semedê Aştîye û komêk Akademîsyenê Aştîye semedê beşdarê Newroza Azadîye bibê, vizêrî bi Ekspresê  Başûrê Kurtalanî Anqara ra ver bi Amedî de rayîr kewtî. Raywanîya bi nameyê “Trena Aştîye” badê 24 saetan resa Amed. Garê Trene ya Amedî temsîlkarê STK, Hemsereka Pêroyî ya Partîya Herêmanê Demokratîke (DBP) Çîgdem Kiliçgûn Uçar, Rêxistina DBP'yî ya Amedî, hemşaredarê DEM Partîye û sîyasetmedaran bi gulan pêşwazî kerdî. Badê pêşwazîkerdişê heyet derbazê wareyê Newroze bî.

 

'Ma semedê aştîye tîya yê'

 

Ayşegul Devecîoglû ke serê nameyê heyetî de qisey kerd û vat, "Ma bi meslegê xo ameyî ke vengê xo yê aştîye tewrê Newroze bikerê." 

 

Badê zî heyet sloganê “Newroze pîroz bo” berz kerdî.