AMED - Rêze-panela çaremîn û dawî ya bi dirûşma “Ji zanistiya kevn ber bi jiyana azad ve!” ku ji aliyê Gerînendetiya Polîtîkayên Jinan a Şaredariya Peyasê ve hatibû organîzekirin, îro li Pirtûkxaneya Berhemên Jinan a Peyasê bi beşdariyeke berbiçav pêk hat. 

 

Di panelê de Hasret Yelboga û Medya Kaya têgeha “Hevjiyana Azad” li ser bingeha teoriya jineolojiyê nîqaş kirin û zanîn û tecrubeyên xwe bi beşdaran re parve kirin. Di civînê de Hevşaredara Peyasê Bêrîvan Gulşen Sîncar, xebatkarên jin ên şaredariyê, endamên Meclîsa Jinan û gelek aktîvîstên saziyên jinan amade bûn.

 

Têgeha ‘Hevjiyana Azad’ û bingehên wê

 

Panelîst Hasret Yelboga têgeha “Hevjiyana Azad” bi mînakên dîrokî ronî kir û diyar kir ku ev têgeh tê wateya avakirina têkiliyên civakî li ser bingeha razîbûn, rêzgirtin û wekheviyê, bêyî zext, ferzkirin an normên kevneşopî. Hasret Yelboga bal kişand ser wê yekê ku “Hevjiyana Azad” bi taybetî di mijarên wekî rolên zayendî, zewac, avahiya malbatê û meylên zayendî de, armanc dike ku mirov ji sînorên civakî derbas bibe û bi azadî tevbigerin.

 

Redkirina desthilatdariya kevneşopî

 

Medya Kaya jî li ser rolên civakî yên jinbûn û mêrbûnê rawestiya û girîngiya têkoşîn û hevgirtina jinan careke din anî ziman. Medya Kaya got: “Hevjiyana Azad, têkiliyên wekhevîparêz ên di navbera kesan de diparêze ku her kes bêyî cudahiya statuya civakî xwedî maf û azadiyên yeksan be. Ev têgeh hevsengiyên kevneşopî yên desthilatdariyê red dike û mafê gel ê bijartina şêwaza jiyana xwe diparêze.” Wê herwiha tekez kir ku hurmet, têgihîştina hevpar û tehamula li hember şêwazên cuda yên jiyanê, azadiya takekesî xurt dike û teşwîq dike.

 

‘Hevjiyana Azad’ di kîjan qadan de derdikeve pêş?

 

Hasret Yelboga û Medya Kaya di axaftinên xwe de qadên ku têgeha “Hevjiyana Azad” tê de derdikeve pêş giştî kirin. Wan diyar kir ku ev têgeh, ji modelên kevneşopî wêdetir, rêbazên jiyanê yên alternatîf ên bi lihevkirina hevpar hatine avakirin, vedihewîne. Panelîstan anîn ziman ku “Hevjiyana Azad” rolên zayendî yên ji aliyê civakê ve hatine ferzkirin red dike û divê her kes bi azadî nasnameya xwe îfade bike. Wan got: “Ev têgeh lêgerîna şêwazeke jiyanê ye ku li derveyî normên civakî, li ser bingeha azadî, rêzgirtin û razîbûnê ava dibe.” Rêze-panela “Ji zanistiya kevn ber bi jiyana azad ve!” bi rûniştina dawî ku têde Hasret Yelboga û Medya Kaya bersivên pirsên beşdaran dan, bi dawî bû.