AMED - Şaredariya Peyasê, bi pêşengiya Serokatiya Daîreya Parastin û Kontrola Derûdorê ya Şaredariya Bajarê Mezin a Amedê, ji bo pîrozkirina 30’ê Adarê Roja Kêmkirina Avêjkan a Navneteweyî, li Sumer Parkê çalakiyek lidar xist. Atolyeya “Girêkên Axê” ya ku di çarçoveya bernameyê de li Qada Civakî ya Sumerparkê hatibû sazkirin, eleqeyeke mezin ji aliyê zarokan û hemwelatiyan ve dîtin.

 

Kargeha ku ji aliyê Gerînendetiya Guherîna Avhewayê û Sifir Avêjk a Şaredariya Peyasê ve hatibû organîzekirin, bi armanca bilindkirina hişmendiya domdariya jîngehê û teşwîqkirina tevlêbûna di nûjenkirina ekolojîk de hate lidarxistin. Di çalakiyên ku bi hevkariya Şaredariya Mezin a Amedê hatin kirin de, standa Şaredariya Peyasê bala zarokan û beşdaran kişand ser xwe.

 

Hevşaredarên Peyasê Bêrîvan Gulşen Sîncar û Cengîz Dundar, alîkarên hevşaredaran, endamên meclîsa şaredariyê û gelek gerînende beşdarî kargehê bûn. Bi xebatkarên Gerînendetiya Guherîna Avhewayê û Sifir Avêjk re gogên axê çêkirin û bal kişandin ser girîngiya parastina jîngehê.

 

Zarokan bi heyecana xwe bala herkesî kişand ser xwe

 

“Atolyeya Girêkên Axê” ji aliyê zarokan ve bi coşeke mezin hate pêşwazîkirin. Beşdaran tovên riwekan û ax tevlihev kirin û “girêkên axê” amade kirin da ku li deverên bêşînahî bên çandin. Armanc ew bû ku deverên zuha û bê rîwek ji nû ve bên şînkirin û piştgirî bidin hevsengiya ekolojîk.

 

Gerînendetiya Guherîna Avhewayê û Sifir Avêjk tekez kir ku ew rêveberiya bermahiyên sifir avêjkê ne tenê wekî vezîvirandinekê dibînin, lê dixwazin wê wekî şêwazek jiyanê ya ku xwezayê diparêze û nû dike, di nav civakê de belav bikin. Berpirsiyan diyar kirin ku ew ê çalakiyên bi vî rengî yên ji bo bilindkirina hişmendiya jiyana ekolojîk bidomînin.

 

Ev xebat ji nifşên nûha ve wekî yek ji gavên girîng ên ji bo hiştina jîngeheke paqijtir û şîntir û ji bo nifşên pêşerojê hate binavkirin.