ENQERE - Rojnamevanên ku ji bo protestokirina girtina rojnamevan Derya Okatan a ji ber çalakiyên wê yên rojnamegeriyê li ber Wezareta Dadê kom bûn gotin, "Materyalên dîjîtal ên ku rastbûna wan nehatiye zelalkirin, nikarin wekî hincet ji bo bêparkirina azadiya rojnamevanekê werin bikaranîn."

 

Endamên Sendîkaya Çapemenî-Kedkarên DÎSK'ê ji bo protestokirina girtina rojnamevan û rêvebera Sendîkaya Çapemenî-Kedkarên DÎSK'ê Derya Okatan a ji ber xebatên wê yên rojnamegeriyê li ber Wezareta Dadê kom bûn. Komeleya Rojnamevanên Jin a Mezopotamyayê (MKG), Komeleya Rojnamevanan a Dîcle Firatê (DFG), KESK HABER-SEN, gelek rojnamevan û hevserokê Şaxa Bajarê Enqerê yê DEM Partiyê Yilmaz Yildirimci beşdarî daxuyaniya ji bo Derya Okatan bûn. Rojnamevanan dirûşmeyên wekî "Çapemeniya Azad Nayê Bêdengkirin" berz kirin.

 

Piştî vê yekê, daxuyaniya çapemeniyê ji hêla endama Lijneya Dîsîplînê ya Sendîkaya Çapemenî-Kedkarên DÎSK'ê Diren Yurtsever ve hate xwendin.

 

'Êrîşek li ser mafê raya giştî yê zanîna rastiyê'

 

Em daxwaza berdana tavilê ya Derya Okatan dikin, ku tohmetên li dijî wê di çarçoveya prensîbên gerdûnî yên hiqûq û azadiya çapemeniyê de werin nirxandin; û ku lêkolînek pispor a serbixwe diyar bike ka kengî û çawa belgeyên ku têne nîqaşkirin bi berhevkirina wan bi wêneyê dadwerî ya ku di sala 2019'an de hatiye kişandin ve hatine veguheztin. Bêdengmayîna li hember zextên li ser rojnamevanan ne tenê temaşekirina windakirina azadiya hevkarekî ye; di heman demê de hevkarê xirapkirina rojnamegeriyê û mafê raya giştî yê agahdarkirinê ye. Ji ber vê yekê, em bang li hemî rêxistinên rojnamegeriyê, komeleyên pîşeyî yên çapemeniyê, sendîkayan, rêxistinên girseyî yên demokratîk û her kesê ku piştgiriyê dide çapemeniya azad dikin ku hevgirtina xwe bi Derya Okatan re xurt bikin. Divê neyê jibîrkirin ku hûn nekarin bi bêdengkirina rojnamevanan rastiyê ji holê rakin. Hûn nekarin bi krîmînalîzekirina rojnamegeriyê pêşî li rastiyê bigirin. Hûn nekarin belgeyên ku çavkaniya wan û çawa gihîştine hard dîska derveyî jî nehatiye zelalkirin wekî bingehên girtinê bikar bînin. Her êrîşek li ser azadiya rojnamevanek êrîşek li ser mafê raya giştî yê zanîna rastiyê ye."

 

Peyama Derya Okatan hate xwendin.

 

Piştî daxuyaniya çapemeniyê, nameyek ji girtîgehê ku Derya Okatan şandibû hate xwendin. Derya Okatan silav da rojnamevanan û ji bo hevgirtina wan spasiya wan kir. Derya Okatan diyar kir ku girtina wê ne şexsî ye û got ku ev êrîşek li ser pîşeyê wê ye.

 

Piştre civîna çapemeniyê bi dawî bû.