ENQERE- Lijneyên rayedar ên DEM Partiyê ji bo nirxandina banga Rêberê PKK’ê Abdullah Ocalan ya ‘Aşitî û Civaka Demokratîk’’ dê sê rojan civînan li dar bixe.

 

Li gorî daxuyaniya Buroya Çapemeniyê ya DEM Partiyê Meclîsa Partiyê û hevserokên bajêran dê bi serokatiya Hevserokên Giştî Tulay Hatînogûllari û Tûncer Bakirhan roja Yekşemê civînekê li dar bixin. 

 

Hate ragihandin ku dê civîn li navenda giştî ya partiyê ya li navçeya Balgatê were lidarxistin. Roja Duşemê dê Lijneya Rêveber a Navendî (MYK) li bînaya partiyê ya li Buklumê bicive. Roja Çarşemê jî dê bi serokatiya hevserokên giştî li navenda giştî ya partiyê ya li navçeya Balgatê civînek were lidarxistin.