AMED - MKG'ê di rapora binpêkirina mafên jinên rojnameger a meha sibatê de diyar kir ku di tevahiya meha sibatê de, bi ser malên rojnamegeran de hate girtin, rojnameger hatin girtin, êrîşên fizîkî li wan hatin kirin, hatin astengkirin û muameleya xerab li qadê li wan hat kirin û hat gotin divê hemû sînordarkirinên li ser azadiya çapemeniyê û xweîfadekirinê li gorî pîvanên navneteweyî yên mafên mirovan werin rakirin.

 

Komeleya Rojnamegerên Jin a Mezopotamyayê (MKG) rapora xwe ya binpêkirina mafên jinên rojnameger a meha sibatê eşkere kir. Li gor raporê 5 jinên rojnameger girtîne û di meha sibatê de jî zext û êrişên li ser jinên rojnameger dewam kirin. 

 

Di dewamiya raporê de wiha hat gotin:

 

"Zext û sansûr li ser rojnamevanan kûrtir dibe: Rojnamegerî ne sûc e

 

"Rapora Sibata 2026'an a li ser Binpêkirinên Mafên Jinên Rojnameger " ku ji hêla Komeleya Rojnamegerên Jin a Mezopotamyayê (MKG) ve hatiye amadekirin, nîşan dide ku mafê rojnamevanên jin ên ragihandina nûçeyan û mafê raya giştî yê wergirtina agahdariyê bi awayekî sîstematîk têne hedefgirtin.

 

Di tevahiya meha sibatê de, bi ser malên rojnamegeran de hate girtin, rojnameger hatin girtin, êrîşên fizîkî li wan hatin kirin, hatin astengkirin û muameleya xerab li qadê li wan hat kirin. Her wiha rojnameger bi sînordarkirina gihîştinê ya di qada dîjîtal de rû bi rû man. Berpirsiyariya giştî ya rojnamegeriyê bi polîtîkayên ewlehî-navendî û atmosferek bêcezatiyê hat tepeserkirin, rojnamevan bi awayên piralî, hem ji ber çalakiyên xwe yên pîşeyî û hem jî ji ber nasnameya xwe ya wekî jin, hatin hedefgirtin.

 

Di vê pêvajoyê de, operasyonên ku saziyên çapemeniyê yên muxalîf û serbixwe hedef digirin, astengkirina ragihandina nûçeyan a fiîlî, krîmînalîzekirina cihên karê rojnamevanan û sînordarkirina dîtinê li ser platformên dîjîtal ne tenê êrîşek li ser rojnamevanan e, lê di heman demê de destwerdanek li mafê raya giştî yê gihîştina rastiyê ye. Ev pêkanînên ku armanc dikin dîtin û dengê rojnamevanên jin tepeser bikin, qada giştî ya demokratîk teng dikin û girêdana bi rastiyê re dijwartir dikin.

 

Em wekî MKG'ê careke din tekez dikin ku rojnamegerî ne sûc e. Şopandina nûçeyan, kişandina wêneyan, veguhestina agahiyan ji bo berjewendiya giştî, belgekirina tiştên ku di qadê de diqewimin û eşkerekirina wan beşên girîng ên azadiya ramanê û azadiya çapemeniyê ne. Armancgirtina rojnamevanên jin binpêkirineke giran a mafan e di warê hemwelatîbûna wekhev, azadiya ramanê û prensîbên civaka demokratîk de.

 

Banga me;

 

*Divê dawî li girtin, îşkence û desteserkirina rojnamevanan were.

 

*Divê destwerdanên hêzên ewlehiyê û muameleya xirab ku rê li ber karê rojnamevanan a di qadê de digirin bi bandor werin lêkolînkirin; divê sûcdar bi bêcezatiyê neyên parastin.

 

*Divê pratîkên sansura dîjîtal tavilê bi dawî bibin; divê sînorkirinên gihîştina naveroka nûçeyan û hesabên medyayê werin rakirin da ku azadiya derbirînê were misogerkirin.

 

*Divê hemû sînordarkirinên li ser azadiya çapemeniyê û xweîfadekirinê li gorî pîvanên navneteweyî yên mafên mirovan werin rakirin.

 

Wekî MKG'ê, em ê li kêleka rojnamevanan bisekinin; ji bo ku binpêkirinên mafên mirovan eşkere bibin û em hevgirtinê xurt bikin.

 

Komeleya Jinên Rojnameger a Mezopotamyayê (MKG)"

 

Ji bo hûrgiliyên raporê hûn dikarin ser lînka li jêr bitikînin:

 

https://mkgdernek.org/kr/blog/rapor/raporen-mehane/rapora-binpekirina-mafen-jinen-rojnameger-a-meha-sibate/2026/03/14288/